Өнгөрсөн оны Дөрөвдүгээр сард Хөдөлмөрийн баатар Н.Түвшинбаярт зодуулж, тархиндаа хүнд гэмтэл авсан Э.Энхбат начин найман сар ухаангүй байсаар бурхан боллоо. Түүнийг 2021 оны Арванхоёрдугаар сарын 31-ны өдөр сүүлчийн замд нь үдсэн юм.

Талийгаачийн эхнэр Б.Нандинцэцэг цахим хуудастаа зарим хүнд баярлаж, талархсанаа илэрхийлсэн байна.

Тэрээр “Ханийн минь сүүлчийн зам нь гэрэлтэй, өвдөх зовуурьгүй, амар тайван байгаа гэж итгэж буян номоо сайн хийнэ. Үлдсэн амьдарлаа гурван сайхан үрийнхээ төлөө, ханийнхаа хийж гүйцээгүйг гүйцээхийн төлөө алхам тутамдаа хичээх болно. Хань минь “Ямар их хүний хайр, хүндлэл ,итгэл дунд байсан юм бэ” гэж бахархаж сууна. 

Тэр өдөр газар дээрээ бурхан болох хэмжээний яргалал амссан ч бидний төлөө найман сар тэмцэж, итгэл найдвар үлдээснийг бодохоор гол харлаж байна.

Тангараг өргөсөн цагдаа нар нь ойртохгүй байхад сэтгэл гаргасан Ялалт ахдаа баярлалаа. “Битгий түргэн дууд” гэж хэлсэн яргачин Н.Түвшинбаярын үгэнд оролгүй, түргэнийг нь дуудаж, хамт өргөж, тээж, гүйсэн Херо Б.Баатар танд, дэргэд байдаг И.Гантулга ахдаа, Х.Цагаанбаатар найздаа тусгайлан баярлалаа. Өнөөдрийг хүртэл түшиг болсон олон найз нөхөд, хамаатан садан, харь элгийн сайхан хүмүүст баярлалаа. Монголын шүүх, цагдаа, прокурор, шүүх эмнэлэг үнэн зөвөөр шийдэж өгнө гэдэгт итгэж хүлээх л үлдлээ.

2022 он та бүхэнд аз жаргал,баяр хөөр,амжилт бүтээл авчирсан сайхан жил болох болтугай” гэжээ.