Талийгаач Улсын начин Э.Энхбатын биед ноцтой гэмтэл учруулсан Хөдөлмөрийн баатар Н.Түвшинбаярын гэм бурууг шүүх хурлын урьдчилсан хэлэлцүүлэг өнгөрсөн сарын 23-ны өдөр болсон билээ. Мөн талийгаач Э.Энхбатын өмгөөлөгч болон прокурорын зүгээс Н.Түвшинбаярыг цагдан хорих саналыг шүүхэд хүргүүлсний дагуу хорих шийдвэрийг шүүх гаргасан. 

Тэгвэл Хөдөлмөрийн баатар Н.Түвшинбаяр шүүх хурлын үеэр, "Тухайн үед би тасарсан байсан, юу болсныг огт санахгүй байна" гэж мэдүүлсэн байна.

Н.Түвшинбаярт Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.1 дэх заалтад зааснаар “Хүний эрүүл мэндэд хүнд хохирол санаатай учруулах” гэмт хэрэгт яллах дүгнэлт үйлдэж ирүүлсэн байдаг. Улмаар Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1 дэх хэсгийн 1.2 дахь заалтад зааснаар шүүх хуралдаанаар нөхөн гүйцэтгэх боломжгүй тул мөрдөн шалгах ажиллагаа хийлгэхээр хэргийг тус дүүргийн прокурорын газарт буцааж шийдвэрлэсэн юм. 

Хохирогч Э.Энхбат Н.Түвшинбаярт зодуулсны улмаас тархиндаа хүнд гэмтэл авч, ГССҮТ-ийн Эрчимт эмчилгээний тасагт олон хоног ухаангүй эмчлүүлсэн. Түүнд эмч нар хоёр ч удаа унтуулгатай мэс засал хийсэн ч бие нь дээрдэхгүй байсаар түүний эхнэр, дүү нь БНСУ руу эмчлүүлэхээр авч явсан билээ. Тэрээр найман сар гаруйг хугацаанд БНСУ-д эмчлүүлж, ухаан орохгүй байсаар 2021 оны Арванхоёрдугаар сарын 24-ны өдөр бурхны оронд одсон юм.