Монгол Улсын өсөх идэр, өрнөн дэлгэрэх, манлай начин Э.Энхбатыг сүүлчийн замд нь үдэх ёслол 31-ний өглөө 05:30 цагаас Спортын төв ордонд болно. 

Улсын начин Э.Энхбат нь өөрийн багийн найз, Хөдөлмөрийн баатар Н.Түвшинбаярт зодуулсны улмаас тархиндаа ноцтой гэмтэл авч удаан хугацааны эмчилгээ хийлгэсэн ч ухаан орохгүй байсаар тэнгэрт дэвшсэн билээ.

Хэргийн талаар эргэн сануулахад, өнгөрөгч дөрөвдүгээр сарын 2-нд Н.Түвшинбаяр согтууруулах ундаа хэрэглэсэн үедээ начин Э.Энхбатыг зодож, хүнд гэмтээсэн үндэслэлээр цагдан хоригдож байгаад хилийн хориг тавиулан суллагдаж, чөлөөтэй явж байсан юм. Эл өдрөөс хойш хэргийг шалгасаар арванхоёрдугаар сарын 23-нд шүүхийн урьдчилсан хэлэлцүүлэг болсон ч хэргийг прокурорын хяналтад буцаасан байгаа. Хэрэгтэн Н.Түвшинбаярт хохирогчийн өмгөөлөгчийн зүгээс хүсэлт гаргаж цагдан хорих арга хэмжээ авхуулаад буй.

Хэргийг шалгах хугацаанд Э.Энхбат начныг БНСУ-д эмчлүүлж байсан ч тус улсын эмч нарын зүгээс найдваргүй гэдэг хариу авч, түүнийг эх оронд нь авчраад удаагүй байсан билээ.

Өсөх идэр, өрнөн дэлгэрэх, манлай начин Э.Энхбат энэ сарын 24-ны өдөр таалал болж монгол түмэнд нөхөж баршгүй гарз тохиолоо.