Ерөнхийлөгч У.Хүрэлсүх өнөөдөр төрийн дээд одон, медаль гардуулж байна. Салбар салбартаа хийж бүтээснээрээ үнэлэгдсэн 40 орчим хүн төрийн дээд одон медаль хүртэж байна.

Үүнд: 

• МҮОНТ-ийн ММ агентлагийн тоймч Жигжидсүрэнгийн Алтангэрэл Соёлын гавьяат зүтгэлтэн;

• "Никитон" хамтлагийн даралтат хөгжимчин, хөгжмийн найруулагч Батмөнхийн Чинбат Урлагийн гавьяат зүтгэлтэн;

• Чөлөөт уран бүтээлч, дуучин, поп дива Сүрэнжавын Наранд Гавьяат жүжигчин цол хүртээлээ. 

Харин Никитон хамтлагийн гишүүн, Хөгжмийн зохиолч, продюсер Б.Чинбат коронавирусийн халдвар авсан байсан тул өнөөдөр шагналаа гардаж чадсангүй. Тэрээр өөрийн цахим хуудсаар дамжуулан талархалаа илэрхийллээ. 

Хөгжмийн зохиолч, продюсер Б.Чинбат "Юуны өмнө төр засаг, түмэн олондоо маш их баярлалаа.

Хөгжим гэдэг энэ агуу ертөнцөд таван настайгаасаа дурлаж өнөөг хүртэл зүтгэж байгаа өчүүхэн авьяас чадвар, хүч хөдөлмөрийг минь үнэлж Төр засаг минь Монгол Улсын Урлагийн Гавьяат Зүтгэлтэн цолоор шагнажээ.

Миний аав яг миний насан дээр Монгол Улсын гавьяат жүжигчин цолоор шагнагдаж байсан билээ. Аав минь байсан бол хичнээн их баярлах байсан бол гэж бодож сууна.

Өнөөдөр дэлхийд нүүрлээд байгаа энэ аюулт тахлыг тойрч гарсангүй дайраад гарсан өдөр нь ингэж давхцах юм гэж хэн санах билээ. Өчигдөр оройны 9 цагт миний шинжилгээний хариу эерэг гараад тэр дороо эмнэлэгт ирж хэвтсэн байна аа. Иргэнийхээ үүргийг биелүүлж бусдыгаа эрсдэлээс хамгаалахын тулд энэ хүндэт төрийн дээд шагналаа гардаж авах цагтаа хүрэлцэн очиж чадахгүй болсондоо төр засаг болон түмэн олон та бүхнээсээ түмэнтэй хүлцэл өчиж байна аа.

Та бүхэн минь амны хаалтаа тогтмол зүүж, хайртай хүмүүсээ эрсдэлээс хамгаалаарай" хэмээн бичжээ.