Нийслэлийн удирдах ажилтны шуурхай зөвлөгөөний үеэр Хотын дарга агаарын чанар муу байсныг дурдаад, сайжруулсан түлшний хэрэглээний талаар холбогдох албаныхнаас тодрууллаа.

Хотын дарга Д.Сумъяабазар "Сүүлийн өдрүүдэд утаа эрс нэмэгджээ. Үнэр нь сайжруулсан түлшнийх биш болов уу гэж хардаж байна. Гэхдээ хяналт шалгалтаар зөрчил илрээгүй гэж ажил хариуцсан хүмүүс тайлбар өглөө. Түлш худалдаж авах боломжгүй иргэдэд үнэгүй түлш олгохоо зогсоосон. Үүнээс болж аргагүйн эрхэнд хог, дугуй түлж байхыг үгүйсгэх аргагүй" гэлээ. 

Нийслэлийн Агаарын бохирдолтой тэмцэх газрын дарга Б.Пүрэвсүрэн "Арванхоёрдугаар сарын 27-ны байдлаар нийслэлд сайжруулсан шахмал түлш борлуулах 607 цэг ажиллаж байна. Борлуулалтын хэмжээ өдөрт 3800  тонноос буухгүй байна. Шахмал түлшний нөөц 24.035 тонн байна. Он дуустал энэхүү нөөцөөс борлуулалт хийхгүйгээр үйлдвэрлэлээс шууд нийлүүлэх боломж байна. Борлуулалтын цэгүүдэд түлшний нийлүүлэлтийг жигд байлгах үүднээс  түлшийг өглөө, үдээс хойш гэсэн хуваариар нийлүүлж зохицуулсан. Түүхий нүүрсний хэрэглээ их байна гэсэн гомдол олон ирсэн. Тиймээс 102 тусгай дугаарт түүхий нүүрс хэрэглэж буй айл өрхийн тухай болон түүхий нүүрс түлдэг аж ахуйн нэгжүүд шүүлтүүрээ унтрааж байгаа, зориулалтын бус түлш хэрэглэж байгаа тухай мэдээллүүдийг хүлээн авдаг болсон.

Нийслэлийн хэмжээнд түүхий нүүрс хэрэглэдэг нам даралтын 2700 гаруй зуух байна. Эдгээрийн нүүрсний хэрэглээг аажмаар бууруулах ажлыг хийж байна" гэлээ.

Мөн сүүлийн өдрүүдэд агаарын чанар сайнгүй байгаа нь стандартын зуухны тоо буцаад цөөрч байгаатай холбон тайлбарлав. Үүний улмаас дутуу шаталт явагдаж, агаарт бохирдуулагч бодисууд үүсэж байгаа аж.

Хотын даргын зүгээс орлого багатай иргэд, айл өрхүүд дугуй, хаймар болон хог шатааж байх магадлалтайг сануулаад, тэдгээр өрхөд өгч буй иргэдийн түлшний тусламжийн талаар тодруулсан юм.

Энэ талаар Нийслэлийн Нийгмийн халамжийн газраас дараах тайлбарыг өглөө.

Тодруулбал, 2022 оны Нэгдүгээр сарын 2-ны өдрөөс эхлэн нийслэлийн хэмжээнд 6000 гаруй өрхөд 5500 тонн сайжруулсан шахмал түлшийг түгээхээр төлөвлөн ажиллаж байгаа аж. Нэн ядуу, бага орлоготой, амьжиргааны 409 онооноос доош орлоготой өрхийн тоо 73 мянган өрх байгаагаас нэн хүнд нөхцөлд амьдарч байгаа 6000 гаруй өрх айлд түлшний тусламж өгөхөөр болсон байна.