Хан- Уул дүүргийн Эрүүгийн хэргийн анхан шатны шүүхэд Н.Түвшинбаярт холбогдох эрүүгийн хэргийн шүүхийн урьдчилсан хэлэлцүүлэг өнөөдөр болж, мөрдөн шалгах ажиллагаа хийлгэхээр хэргийг прокурорт буцаалаа. 

Шүүх хуралдааны дараа Н.Түвшинбаярын өмгөөлөгч "Н.Түвшинбаяр гэм буруутай эсэх дээр маргахгүй байгаа бөгөөд шаардлагатай төлбөрүүдийг төлж байгаа. Одоогийн байдлаар 3 тэрбум төгрөгийн нөхөн төлбөрийг төлсөн. Цаашид ч хохирлыг нөхөн төлнө. Түүний хувьд гэмшиж байгаа. Хохирогчийн эрүүл мэндэд санаа зовж байгаа. Хэргийг хянан хэлэлцээд нэмэлт мөрдөн байцаалтад шилжүүллээ" гэсэн билээ. 

Уг асуудлаар хохирогч Э.Энхбатын өмгөөлөгч О.Санчирбалаас тодруулахад "Хохирогч Э.Энхбат БНСУ-ын эмнэлэгт урт хугацаанд эмчилгээ хийлгэсэн. Эмчилгээний зардал өдөр бүр гарч байгаа. Н.Түвшинбаярын өгсөн 3 тэрбум төгрөг нь 100 хувь эмчилгээний төлбөрт зарцуулагдсан. Өөрөөр хэлбэл, шууд эмнэлгийн данс руу шилжүүлж байсан, хохирогчийн ар гэрт бол өгсөн мөнгө төгрөг байхгүй. Харин эмчилгээний зардлын үлдэгдэл 400 орчим сая төгрөг болсныг Э.Энхбатын ар гэрийнхэн төлж барагдуулсан. Мөн түүний ар гэрийнхэн Солонгост найман сар орчим болоход зарцуулсан байр, хоол хүнс гэгчилэн зардлууд гарсныг шүүх хурлын үеэр хэлэлцэнэ" гэсэн юм. 

Харин хохирогчийн эхнэр Б.Нандинцэцэг "Зарим сайт гарчигаа мушгиж тавихаа болино уу!!!! Нэг ч төгрөг миний дансруу ороогүй юм шүү! Гуравхан тэрбумаар бүү ханийг минь үнэл!!!!

Яаж биднийг зовоож туйлдуулж хагас дутуу өглөө дөө!!! Ер нь гэмт хэрэгтэнг ямар хүн өмгөөлж хамгаалдаг байнаа …" гэжээ.