"Сайжруулсан түлшний цогц хэрэглээ" аяны хүрээнд нийслэлийн агаарын чанарын мэдээллийг БОАЖЯ, ЦУОШГ, НМХГ, НЭМҮТ, "Таван толгой түлш" ХХК болон бусад холбогдох байгууллагаас хамтарсан мэдээлэл хийлээ. 

Нийслэлийн нутгийн захиргааны байгууллагуудын ажилтан, албан хаагчид өнөөдрөөс эхлээд төвийн зургаан дүүргийн гэр хороололд хяналт шалгалтын ажиллагааг эхлүүлжээ.

Нийслэлийн Засаг даргын орлогч Д.Ихбаяр "Айл өрхүүд түүхий нүүрс түлж байгаа талаарх мэдээллүүд ирж байгаа. Тиймээс нийслэлийн Онцгой комиссын даргын тушаалаар ажлын хэсэг байгуулагдаж, өнөөдрөөс хяналт шалгалтын ажлыг эхлүүлж байна" гэв.

Сайжруулсан шахмал түлшийг нийслэл хотоос тээвэрлэн гаргах зөрчлөөс сэргийлэхээр нэг сарын хугацаатай хяналт шалгалтын ажлыг эрчимжүүлж байгааг Эрчим хүчний яамны төлөөлөл мэдээлэв. Энэ хүрээнд амжилттай ажилласан мэргэжлийн хяналт, цагдаагийн 40 албан хаагчийг 1 сая хүртэл төгрөгөөр урамшуулал олгохоор болжээ. 

Нийслэлийн Агаарын бохирдолтой тэмцэх газрын дарга Б.Пүрэвсүрэн "Товчоодоор орж ирж байгаа түүхий нүүрсийг илрүүлээд ямар хариуцлага тооцох нь тодорхойгүй байсан бол 2021 оны "Агаарын чанарын бүс түүнд мөрдөх журамд"-д орсон өөрчлөлтийн хүрээнд агаарын чанарын бүсээс гаргаж байгаа сайжруулсан түлш болон оруулж ирж байгаа зөвшөөрөлгүй түүхий нүүрсийг хурааж авах эрх зүйн зохицуулалттай болсон. 

Ингэснээр сайжруулсан шахмал түлшний зохиомол хомсдол бий болохоос сэргийлж байгаа. Үнийн хөнгөлөлттэй холбоотойгоор сайжруулсан шахмал түлшийг агаарын чанарын бүсээс гаргах зөрчил нэмэгдэж байна" гэв.

Өнгөрсөн 7 хоногт Улаанбаатар хот руу 10 тонн түүхий нүүрс нэвтрүүлэх гэсэн зөрчлийг илрүүлж, нүүрсийг Амгалан дулааны станцад буулгажээ. Мөн 200 шуудай сайжруулсан шахмал түлшийг нийслэл хотоос гаргах гэж байсныг илрүүлэн буцаах арга хэмжээ авсныг НМХГ-аас мэдээллээ.

Мөн "Агаарын чанарын бүс түүнд мөрдөх журамд"-д орсон өөрчлөлтийн хүрээнд дээрх үйлдлүүдэд Зөрчлийн тухай хуульд заасны дагуу хариуцлага тооцжээ.