-Аудитын шалгалтаар эрүүл мэндийн байгууллагуудад зөрчил илэрчээ-

Олон улсын валютын сан Монгол Улстай зөвлөлдөх уулзалт хийж, эдийн засгийн үнэлгээ хийх үеэр ковидын үеийн хандив тусламжийн зарцуулалтыг ил тод тайлагнахыг Засгийн газарт зөвлөсөн байна. Чингэхдээ ковидтой холбоотой зардлын аудитын бүрэн тайланг нийтлэхийн чухлыг онцлон тэмдэглэж, үр дүнгийн талаарх мэдээлэл хангалтгүй байгааг анхааруулжээ.

Дээрх асуудлыг хөндөн “Фиделитас Партнерс" хуулийн фирм Нээлттэй Нийгэм Форум ТББ-ын дэмжлэгтэйгээр “Эрхээ эдэлье” аяныг зохион байгуулсан бөгөөд эл мэдээллийг ил тод болгох, иргэдийн мэдэх эрхийг хангахаар стратегийн өмгөөллийн төслийг хэрэгжүүлж, аяны үйл ажиллагаа амжилттай үргэлжилж байна. Аяны хүрээнд олон удаагийн хэлэлцүүлэг зохион байгуулж, шүүхэд нэхэмжлэл гарган, иргэдийг мэдээллээр ханган ажилласан бөгөөд ХҮЭК-ын гишүүний шаардлага гарсан билээ.

Цар тахалтай нүүр тулснаас хойш хоёр жилийн хугацаа өнгөрч, хандив тусламжийн зарцуулалт болон шилэн дансны мэдээллүүдийг хуулийн дагуу албан ёсны сайтад байрлуулах ёстой ч Засгийн газар, УОК, ХӨСҮТ тэргүүтэй төрийн байгууллагуудын аль нь ч эл үүргээ хангалттай биелүүлэхгүй байгаа юм.

Тухайлбал, Үндэсний аудитын газраас Эрүүл мэндийн сайдын эрхлэх асуудлын хүрээний байгууллагуудын 2020 оны санхүүгийн тайлангийн аудитаар тогтоосон төлбөрийн акт, албан шаардлага, зөвлөмжийн хэрэгжилтийн дүнг танилцуулах арга хэмжээ зохион байгуулахад  Ковид-19 цар тахалтай холбоотой ЭМЯ-ны бэлтгэсэн хөрөнгийн өртөг, бүртгэл зарцуулалтыг үнэн зөв бүртгээгүй, цар тахлаас урьдчилан сэргийлэх, эрсдэлийг бууруулах, улаан бүсэд ажилласан эмч, эмнэлгийн ажилтнуудад цалин хөлс, нэмэгдэл, илүү цагийн ажлын хөлсийг бодитой тооцдоггүй нийтлэг алдаа зөрчил илэрсэн байна.

Түүнчлэн 2021 оны эхний хагас жилийн тайлангаар төрийн болон орон нутгийн өмчит бус этгээдээс авсан хандив тусламж 31.55 тэрбум төгрөг байхад шилэн дансанд 391.2 сая төгрөгийн хандив тусламжийн талаарх мэдээлэл тусгагдсан бөгөөд ЭМЯ 2020 оны хагас жилийн тайлангаа бүтэн жилийн тайлангаар давтан оруулсан зэрэг зөрүүтэй мэдээллүүд байгаа юм. Энэ мэтчилэн хандив тусламжийн нийт дүн бүртгэл, зарцуулалт иргэдийн мэдэх эрхийг илтэд зөрчсөн, Шилэн дансны хуулийн хэрэгжилтийг алдагдуулсан, замбараагүй, дутуу дулимаг тайлан мэдээлэлтэй байгаа нь харамсалтай.

Ямартай ч дотоодын хуулийн фирм хагас жил орчмын хугацаанд идэвхжүүлэн ажиллаж байгаа энэхүү санаачлагыг Олон Улсын Валютын Сан ч засгийн газарт ирүүлсэн албан ёсны зөвлөмждөө тусгаж, хэрэгжүүлэхийг зөвлөөд байна.