Өмнөд Солонгос улсын дунд сургуульд сурдаг 13 настай монгол охиныг дээд ангийн дөрвөн сурагч охин нийлж зургаан цагийн турш хүлж байгаад зодсон ноцтой хэрэг гарсан талаар тус улсын хэвлэл мэдээллийн хэрэгслээр цацагдаж, хоёр улсын иргэдийг маш ихээр бухимдуулаад байна. 

Мөн өчигдрөөс эхлэх Өмнөд Солонгос болон Монгол улсын иргэд хүчирхийлэлд өртсөн Монгол охины эрхийг хамгаалж, БНСУ-ын Ерөнхийлөгч Мүүн Же Ин-д хандахаар энэхүү https://www1.president.go.kr/petitions/Temp/P7m674 линкээр санал цуглуулж байна. 

Тэгвэл өнөөдөр Монгол залуусын төлөөлөл БНСУ-ын Элчин сайдын яамны гадна очиж, сурагч охиноос уучлалт гуйх, хэргийг хуулийн хүрээнд нэн даруй шийдвэрлэхийг шаардан залуус тайван жагсаал хийлээ.

Тэд энэ үеэрээ "Сурагч охиноос уучлалт гуйх, ууучлалт гуйсан мэдэгдлийн албан ёсны цахим хуудсандаа байршуулах, хохирогч охинд өмгөөлөл болон сэтгэл зүйн тусламж үйлчилгээ үзүүлэх, нөхөн төлбөр олгох үэрэг агуулга бүхий албан бичгийг БНСУ-аас Монгол Улсад суугаа Элчин сайдын яаманд хүргүүллээ. 

Тус албан бичгийг хүлээн авсан БНСУ-аас Монгол Улсад суугаа ЭСЯ-ны зөвлөх Ким Чол Сан дараах мэдээллийг хийв.

Тэрээр "Манай хоёр улс дипломат тогтоосноос хойш 30 гаруй жилийн хугацаа өнгөрч байна. Найрсаг хамтын ажиллагааг амжилттай хөгжүүлж ирсэн энэ цаг хугацаанд ийм харамсалтай хэрэг гарсанд би хувьдаа болон ЭСЯ-ны дипломат ажилтныхаа хувьд туйлын харамсаж байгаагаа илэрхийлье. Энэхүү болсон явдлыг нэн даруй, шударгаар шийдвэрлэх талаар БНСУ-ын холбогдох байгууллагуудтай үргэлжлүүлэн хэлэлцэж байна.

Манай улсын Засгийн газрын зүгээс уг хэргийг шуурхай, шударгаар шийдвэрлэхэд анхаарлаа хандуулж, ажиллах болно. Мөн шийдэгдсэн даруйд нь Монгол Улсын Засгийн газарт нэн даруй мэдэгдэнэ. Солонгосын Засгийн газар дээрх хэргийн талаар хангалттай мэдээлэлтэй байгаа бөгөөд идэвхтэй ажиллахаа илэрхийлмээр байна.

Солонгос улсад Монгол Улсын 40 гаруй мянган иргэн ажиллаж, амьдарч байгаа юм. Энэ бол миний мэдэж байгаачлан бага тоо биш бөгөөд эдгээр хүний ажиллаж амьдарч буй нь хоёр улсын харилцааг гүнзгийрүүлэн хөгжүүлэхэд маш чухал үүрэг гүйцэтгэж байгаа гэж хувьдаа боддог. Цаашид энэхүү суурин дээрээ тулгуурлаад хоёр улсын иргэд төдийгүй Засгийн газрын түвшинд найрсаг харилцаа үргэлжлэн хөгжинө гэдэгт итгэлтэй байна" гэлээ.