Нийслэлийн удирдах ажилтнуудын шуурхай зөвлөгөөн өнөөдөр боллоо.

Хотын даргын Д.Сумъяабазар өмнөх шуурхай зөвлөгөөнөөр долоон чиглэлээр үүрэг даалгавар өгснөөс 88.6 хувийн биелэлттэй хэрэгжжээ.

Шуурхай зөвлөгөөний дараа Хотын дарга Д.Сумъяабазар мэдээлэл хийж, Улаанбаатар хот Арванхоёрдугаар сарын 15-аас "Шар" бүсэд шилжихээр болсон талаар мэдээллээ.

Тэрээр “Нийслэлийн ирэх оны төсвийг хэлэлцэж байна. “Ковид 19”-ийн дараах эдийн засгийн сэргэлтийг дэмжих бодлого гарах гэж байгаатай уялдуулан нийслэлд үйл ажиллагаа явуулдаг 150 гаруй мянган аж ахуй нэгжид тулгамддаг асуудлуудыг шийдэхэд бид ажиллаж байна. Жишээлбэл, төрийн хүнд суртал, дарамт, бизнес хийх нөхцөлд саад учруулдаг байдлыг шийднэ.

Улаанбаатар хотын иргэд III тундаа идэвхтэй хамрагдаж байна. Өөрсдийгөө болон бусдыг хамгаалах, өвчин авсан ч хүндрэлгүй гарахын тулд нийслэлээс III тундаа хамрагдахыг уриалж байгаа. Төрийн захиргааны албан хаагчдыг захиргааны арга хэрэглэж шахаж байна. Гэхдээ төрийн захиргааны албан хаагчид манлайлж оролцох ёстой. III тун бол бидний дараа дараагийн ажлын үндэс суурь болно.

Бид арванхоёрдугаар сарын 15-нд “Шар” бүсэд шилжих, вирустэй зэрэгцэн амьдрах ганц арга зам бол вакцин. Тиймээс III тундаа хамрагдах хэрэгтэй. Хотын зорилтот бүлгийн 50-аас дээш хувийг вакцинжуулж чадвал хотын амьдралыг хэвийн болгох, ирэх жилийн томоохон бүтээн байгуулалтын суурь ажлуудыг хийх гэсэн бодлогыг баримталж байна.

Бизнесийн орчныг арванхоёрдугаар сарын 15-аас хэвийн үйл ажиллагаанд шилжүүлэх, хүнд суртлыг арилгах бодлогыг нийслэлээс боловсруулж байна. Энэ ажлын хэсгийг Засаг даргын ахлах зөвлөх Д.Мөнх-Эрдэнэ ахлан ажиллаж байгаа.

Бид богино хугацаанд хууль хэлэлцэхээс өмнө Их хурал, Засгийн газарт хүргүүлнэ” гэлээ.