Улсын Онцгой комисс өнөөдөр шуурхай хуралдлаа. 

Шадар сайд С.Амарсайхан "Эрдэмтэд шинэ хувилбарыг судалж эхэлсэн байгаа. Хичнээн хор хохиролтой, урд өмнөх вируснуудаас юугаар ялгаатай талаар ДЭМБ болон бусад байгууллагууд ажиллаж байна. Эцсийн байдлаарх дүгнэлт гараагүй байна.

УОК-ын хурлаар хэд хэдэн асуудлыг авч шийдвэрлэлээ.

Үүнд:

1. Шинэ хувилбар бүртгэгдсэн улсаас зорчин ирж байгаа, тэдгээр улсаар дамжин өнгөрсөн гадаадын иргэдийг хүлээн авахгүй байх;

2. Тэдгээр улс орнуудад зорчсон, дамжин өнгөрсөн, халдвар өндөртэй эрсдэлтэй бүсээр аялсан зорчсон Монгол Улсын иргэдийг хүлээн авах бөгөөд ирэхэд нь өөрсдийн зардлаар 10 хоног тусгаарлалтад байх;

3. Өнөөдөр ирэх 200 гаруй энхийг сахиулагчдын байсан тухайн улсад нь халдвар бүртгэгдээгүй. Бүгд шинжилгээнд хамрагдсан хэдий ч 10 хоногийн хугацаанд цэргийн амралтад тусгаарлана;

4. Нисэх онгоцны буудал, авто замын боомт, хилийн шалган нэвтрүүлэх орчимд иргэд, зорчигчдоос шинжилгээ авна;

5. Онцын шаардлагагүй бол гадагшаа аялахгүй байх, шинэ мутац бүртгэгдсэн зөөвөрлөгдсөн улсаар зорчсон иргэдийг өөрсдийнх нь зардлаар 10 хоног тусгаарлахаар боллоо. 

Иргэддээ хандан хэлэхэд, айж сандралгүй асуудалд тайван хандахыг хүсье.

Мөн дотоод ямар нэгэн хязгаарлалт болон хөл хорио тогтоох тухай асуудал огт яригдаагүй" гэлээ.

Ковидын шинэ мутац "Омикрон" хувилбар Өмнөд Африк, Ботсван, Зимбабве, Намиби, Лесото, Эсватини, Мозамбик, Малави, Израиль, Хонконг, Бельги гэсэн улсуудад бүртгэгдээд байна.

ДЭМБ шинэ мутац тархаж байгаатай холбоотойгоор улс орнуудыг вакцины хамрагдалтаа нэмэгдүүлэхийг зөвлөж байна.