"Тэвчээр тасарлаа" хөдөлгөөнөөс үйлчилгээний байгууллагуудын цагийн хязгаарлалтыг эсэргүүцэж, 24 цагаар ажилдаг болгох талаар хэвлэлийн хурал хийлээ.

Энэ үеэр "Тэвчээр тасарлаа" хөдөлгөөний үүсгэн байгуулагч Д.Булгантамир “Баар, караоке, паб цар тахлаас хойш үйл ажиллагаагаа явуулахгүй болоод хоёр жилийн хугацаа өнгөрлөө. Зарим нь түрээсээс эхлээд өрийн дарамтад орж байна.

Тухайлбал, миний бие ийм асуудлаас үүдэн жил гаруйн хугацаанд нийгмийн даатгал төлж чадаагүй. УОК, Засгийн газрын шийдвэрүүдээс болж өнөөдөр би банкны хар дансанд бичигдчихсэн явж байна. Ажилгүй, ажиллах боломжгүй байгаагаа банканд учирлаад нэмэргүй. Учир нь энэ бол банкны асуудал биш гэж хариу өгдөг.

Саяхнаас л бид шөнийн 00:00 цаг хүртэл ажиллаж эхэлсэн. Гэвч энэ төрлийн үйлчилгээний газраар иргэд 22:00 цагаас хойш орж ирж үйлчлүүлдэг. Цагтаа хаалгаа бариад, үйлчлүүлэгчээ гаргах гэсээр мэргэжлийн хяналт, цагдаа гэх мэт хүмүүс цаг хэтрүүлж хэтэрсэн гэж торгож байна.

Манайх дээд тал нь 40 хүн хүлээн авах чадалтай үйлчилгээний газар. Гэвч ийм асуудлаас болж манайх гурван удаа шүүхээр орж, 500 мянгаар торгууллаа.

Би хүнд үйлчилснийхээ төлөө, ажлын байр бий болгосныхоо төлөө банкны хар дансанд орж, дээрээс нь торгуулж байгаад гомдолтой байна. Оройн цагаар ажилладаг үйлчилгээний газрыг дагаад жолооч, ТҮЦ гээд олон хүн амьдралаа залгуулдаг. Оюутнуудад хүртэл түр ажлын байр бий болдог. Гэвч цагийн хязгаарын дарамтаас болж тэдгээр хүмүүс ч хохирч байна.

Бид мөрөөрөө, дарамтгүй ажлаа хийж, нийгмийн даатгалаас эхлээд өр зээлээ төлж, ажлын байр бий болгомоор байна” гэлээ.