"Тэвчээр тасарлаа" хөдөлгөөнөөс үйлчилгээний байгууллагуудын цагийн хязгаарлалтыг эсэргүүцэж, 24 цагаар ажилдаг болгох талаар хэвлэлийн хурал хийлээ.

Энэ үеэр "Тэвчээр тасарлаа" хөдөлгөөний үүсгэн байгуулагч Д.Амартүвшин "Ковидын үед аж ахуйн нэгжид цагийн хязгаарлалт үйлчилж байгаагаас үүдэн тухайн аж ахуйн нэгжүүд маш хүнд байдалд ороод байна. Өглөө, оройдоо нийтийн тээвэрт маш олуулаа шахалдаж явж байна. Гэвч оройдоо 30-50 хүн үйлчлүүлдэг баар, цэнгээний газар үйл ажиллагаа явуулах гэхээр мэргэжлийн хяналт, цагдаа гэх мэт албаныхан ирж дарамталж байна. Үүнээс болж орон байрны архидалт үнэхээр утгаа алдлаа. Орой бүр байрны гадаа цагдаа хүрч ирээд хүн авч явж байгааг харж байна.

Цагийн хязгаарын дарамтаас болж хүмүүс уудаг газраа биш орон гэртээ, хүүхдийнхээ хажууд, эхнэрийхнээ хажууд, хутганыхаа хажууд архи, согтууруулах ундаа ууж байгааг анхаарах ёстой.

Мөн маш олон газар бүр нууцаар ажиллаж байгаа ч асуудал үүсгэж байна. Энэ нь эргээд тухайн газарт гарсан ямар нэг хэрэг, үйл явдлыг нуух ч эрсдэл үүсгэнэ.

Гэхдээ тэр газрууд хоёр жилийн хугацаанд хаалттай байсан. Хаалттай байсан хугацааныхаа түрээсээс эхлээд бүх зардлаа нөхөж олох шаардлага аж ахуйн нэгжүүдэд тулгарч байгааг ч бодох шаардлагатай. Бид зүгээр л ажлаа хиймээр байна.

Хоёр нүүртэй КОВИД-ын журмыг больж, цагийн хязгаарыг зогсооё. Маш олон хүний амьдрал дээсэн дөрөө дээр байгааг анхаарах ёстой. 

Сүүлд нь хэлэхэд, Улаанбаатар 1.5 сая хүнтэй хот. Энэ олон хүнийг зөвхөн 08:00-21:00 цагийн хооронд бүгдийг нь шавуулахаар өдрийн ачаалал нь нэмэгдэж, нөгөө л хотын түгжрэлээс эхлээд бүх асуудал үүсэж байна. Дэлхий дахинд нэг саяас дээш хүн амтай бүх хот шөнийн цагаар ажилладаг газартай байдаг. Шөнийн хоолны газар, шөнийн зах, шөнийн баар цэнгээний газар ажиллуулж байж өдрийн ачааллыг багасгана гэдгийг төр засаг ойлгох ёстой" гэлээ.