“Тэвчээр тасарлаа” хөдөлгөөний зохицуулагч Д.Амартүвшинд холбогдох хэргийн шүүх хурал СБД-ийн Эрүүгийн хэргийн анхан шатны шүүх дээр боллоо. Шүүхээс түүнд 500 мянган төгрөгийн торгууль ноогдуулах шийдвэр гаргасан байна. 

Иргэн Д.Амартүвшин өнгөрөгч долдугаар сард Сүхбаатарын талбай дээр “Тэвчээр тасарлаа” гурав минутын гацалт /flash mob/ зохион байгуулсан юм.

Сануулахад, Flash mob-д 40 орчим залуус оролцож, УОК-оос тавьсан шаардлагын дагуу хоорондоо гурван метрийн зай барьсан байсан билээ. 

Д.Амартүвшин шүүх хуралдааны дараа мэдээлэл өглөө. 

Тэрээр "Долдугаар сард нотлох баримт хангалтгүй үндэслэлээр хойшилсон байсан шүүх хурал маань гэнэт энэ Даваа гаригт зарлагдсан. Хэргийн материалтайгаа танилцаагүй байсан тул шүүх хурал өнөөдөр болж хойшилсон байсан. Шүүх хурал сая боллоо. Яг л нөгөө нотлох баримтын шаардлага хангаагүй материал тэр хэвээрээ орч ирээд, тэр материал дээрээ үндэслээд шүүхийн шийдвэр гарлаа. 500 мянган төгрөгөөр торгууллаа. 

Би нэг зүйл дээр харамсаж байна. Яг адилхан улбар шар түвшинд дарга нар яаж аашилж байсныг та бүхэн харсан байх. Бид нар дээр хэрэг хэрхэн үүсгэж, шийдэж байгааг харж болохоор байна. Би хуулиа хүндлээд хариуцлагаа хүлээнэ. Харин тэр "Дижитал үндэстэн" арга хэмжээг зохион байгуулж, махан овоо үүсгэсэн хүмүүст бас хариуцлага тооцох байх, хариуцлагаа хүлээнэ биздээ гэж хэрмээр байна. Дарга нарт үйлчилдэг хууль тусдаа, иргэнд үйлчилдэг хууль тусдаа юм бол тэрийгээ эртхэн зарлах хэрэгтэй. Бид дүрвэмээр байна. Үгүй бол тэр хүмүүсдээ хариуцлага тооц. Одоо зарим нь сайдын суудал горилоод явж байна" гэлээ. 

Мөн тэрээр шүүхийн шийдвэр гарсан үндэслэлийг "Прокурор нь гамшгийн тухай хууль зөрчсөн гэж орж ирсэн боловч шүүх дээр жагсаал цуглааны хууль зөрчсөн гэх шийдвэр гарлаа. Бид үнэндээ яах байсан юм. Яаж үгээ хэлэх байсан юм. Өөрсдийнх нь баталсан хууль шүү дээ. Хүмүүс ажлаа хийж чадахгүй байна. Хэн орж ирээд бид нарыг дарамтлах бол гэсэн айдастай ажиллаж байна. Өнөөдрийн шүүх хурал дээрээс бид нар чимээгүй зогсох ч эрхгүй болсон гэдэг нь харагдаж байна.

Гэтэл чимээгүй зогсох нь битгий хэл, махан овоо босгож, шоу хийсэн хүмүүс сайд болох гээд явж байна" гэв.

Үндсэн хуулийн 14.1-т "Монгол улсад хууль ёсоор оршин суугаа хүн бүр хууль, шүүхийн өмнө эрх тэгш байна" гэж заасан байдаг.