#NoDoubleStandard хөдөлгөөний зохицуулагч иргэн Э.Одбаяр, Д.Монголхүү нарыг суллахыг шаардаж, Сүхбаатарын талбайд үзэл бодлоо илэрхийлсэн Ц.Жаргалсайхан, А.Дөлгөөн хэмээх 21 настай хоёр залууг цагдаа нар өнөөдөр өглөө гэрийнх нь гаднаас баривчилж, БЗД-ийн Цагдаагийн 2-р хэлтэст авчирчээ. Ингэхдээ орцноос зэрэгцэн гарч ирсэн хүнийг хамтад нь цагдаагийн хэлтэст хүргэжээ.

Мэдүүлэг өгөөд гарч ирсэн Ц.Жаргалсайхан болон түүний өмгөөлөгч А.Пүрэвдулам нартай ярилцсаныг хүргэж байна.

Иргэн Ц.Жаргалсайхан "Сүхбаатарын талбайд бид өчигдөр бүр үг хэлэх, үзэл бодлоо илэрхийлэх эрхээ эдэлсэн. Гэтэл тэдний хэлж байгаагаар уриа, лоозон ашиглаж, олон нийтийг жагсаал, цуглаанд уриалсан хэмээн өнөө өглөө биднийг гэрийн гаднаас баривчилсан. Машины багаажинд хов хоосон цаасан хайрцаг байсан. Гэмт хэргийн бүрэлдэхүүнгүй хэмээн хааж байх шиг байна. 

-Та хоёртой цуг нэг ахимаг насны хүнийг баривчилсан гэсэн? 

-Тэр манай байрны ах юм шиг байна лээ. Картонон цаасан дээр "Хэнтий явна" гэсэн бичиг бичээд явж байсан чинь цагдаа нар хүрч ирээд баривчилсан байна лээ. Тэгээд үзүүлэхгүй, яасан юу болсон гэхэд цагдаагийн шаардлагыг биелүүлээгүй гээд баривчилсан байна лээ.  

Өмгөөлөгч А.Пүрэвдулам "Үндсэн хуулинд зааснаар аливаа иргэн үг хэлэх, үзэл бодлоо илэрхийлэх эрхтэй. Гэтэл өнөө өглөө үзэл бодлоо илэрхийлснийх нь төлөө энэ хоёр залууг цагдаагийн газар авчирсан байна. Монгол улсын иргэн үзэл бодлоо илэрхийлсний төлөө баривчлагдмааргүй байна. Машин тэргийг нь хурааж авмааргүй байна. Ер нь сүүлийн үед иргэдийг цагдаа нар сүрдүүлэх байдал нэмэгдлээ. Өмгөөлөгчийн ажлаа хийсний төлөө намайг яллагдагчаар татлаа. 

Иргэн Б.Билгүүн "Энэ хоёр залууг Сүхбаатарын талбайгаас дагасан юм уу, утсыг нь чагнасан юм шиг байна. Гэрт нь хүртэл үзлэг хийнэ гэсэн байна. Хуулийн мэдлэггүй, эрхээ мэдэхгүй бол гэртээ үзлэг хийлгэх нь л дээ. Өмгөөлөгч А.Пүрэвдуламд хүртэл цагдаагаас зөвлөмж өгсөн байна лээ. Ингэж болохгүй. Нэг зүйлийг залруулж хэлмээр байна. Э.Одбаярыг суллаагүй шүү. Эмнэлэгт хэвтүүлсэн. Иргэдийг ингээд араас нь хоморголон баривчилж байна" гэлээ. 

Тэдэнтэй хамт орцноос цуг гарч ирсэн ахимаг насны иргэнийг мөн хүч хэрэглэн баривчилсан бөгөөд цагдаагийн байгууллагаас андуурсан байна хэмээн суллажээ.