#NoDoubleStandard хөдөлгөөний зохицуулагч Д.Монголхүү болон Э.Одбаяр нарыг ковидын үеийн хууль зөрчсөн хэмээн цагдан хорих 461 дүгээр ангид саатуулаад байгаа билээ. Иргэн Э.Одбаяр өмгөөлөгчгүйгээр байцаасан, хорих тогтоол гаргасан зэрэг хуулийн ялгамжтай байдлыг эсэргүүцэж тус хорих ангид өлсгөлөн зарлаад 20 гаруй хонож байна. Одоогоор түүний биеийн байдал хүнд, бөөрний дутагдалд орсон, 10 гаруй кг жин алдсан талаар мэдээлж байна. 

Монголд нүүрлээд буй энэхүү хуулийн ялгамжтай байдлыг эсэргүүцэж, Төрийн соёрхолт, Монгол Улсын гавьяат жүжигчин Д.Сосорбарам өөрийн байр сууриа илэрхийллээ. 

Тэрээр "Би үнэхээр гайхаж байна. Миний дүү нар, үр хүүхэдтэй адилхан хүүхдүүдийг баривчилснаас хойш тайван байх арга алга. Орох байх газраа олж ядаж байгаа Монгол хүний эрхийг, эдийн засгийн чөлөөт байдлыг бүгдийг нь боомилж байгаад бухимдаж байна. 

Монголын төр данхайж байгаа. Эрх чөлөөний төлөө дуугарч байгаа хүн бүрийг ялгаварлан гадуурхаж, гудамжинд гаргаж байна. Ингэж хүний эрхийг зөрчихгүй. Хувь хүн, хувийн өмчийн эрх, эдийн засгийн чөлөөт тогтолцоог мөрөөдөж байна. Хүүхдүүдийн эрүүл мэнд, амь насанд аюул заналхийлэл хийж байгаа үйлдлээ, хүний эрхийн төлөө тэмцэж байгаа хүүхдүүдийг боомилохоо яг одоо зогсоо.

Сүхбаатар дүүргийн нэгдүгээр хорооны цагдаагийн дарга хурандаа социализм сайхан байсан гэж ярьсан. Би нэг удаа Д.Монголхүүг өмөөрч очсон юм.

Монголын төрд гэмт хэрэгтнүүд зонхилсон байна. Ярьснаасаа өөрийг хийдэг хүмүүстэй залуучууд тэмцэж байна.

Хүний эрхийн дэд хороонд эмэгтэйчүүд ажилладаг. Үр хүүхэд төрүүлсэн эх хүн мөн үү. Тэгвэл яг адилхан тийм эх хүний хүүхдүүд өнөөдөр шоронд хоригдоод, 23 хоног өлсгөлөн зарлаад байна. Энэ зүйлд шархирч, хуралдаа очин ирцээ бүрдүүлэн суудаггүй юм уу?

Өнөөдрийн төрд байгаа хүмүүсийг гэмт хэрэгтнүүд гэж хэлмээр байна. Үүнийг эсэргүүцэх залуучууд босож байгаа. Тэднийг хорьж чадахгүй. Хүний эрхийн төлөө тэмцэж байгаа хүүхдүүдийг боомилохоо яг одоо зогсоо. 

Халамж тарааж хүмүүсийг залхуу, архичин болгож байна. Бүгд үхэхийн хооронд нэгнийхээ амиар даапаалахаа боль. Эрх баригчид хуулийг гууль болгож байгаа. Та нар хуулийг ус, хогтой хольж байна. Шоронд байгаа хүүхдүүд ямар ч гэмт хэрэг хийгээгүй. Ардчилсан намынханд уриалж байна. Э.Одбаяр, Д.Монголхүү нарын эрхийг хамгаалж бид дуугарах ёстой" гэлээ.