УИХ-ын чуулганаар Шүүхийн шийдвэр гүйцэтгэх тухай хуульд нэмэлт оруулах тухай хуулийн төслийг хэлэлцэв.

Энэ үеэр УИХ-ын гишүүн С.Одонтуяа 461 дүгээр хорих ангид хоригдож, хууль бус шийдвэрийг эсэргүүцэж өлсгөлөн зарлаад 20 гаруй хонож буй иргэн Э.Одбаярын нөхцөл байдлын талаар тодруулж "461 дүгээр ангид хоригдож байгаа иргэн Э.Одбаярын асуудал хүнд байна. Үгээ хэлж, үзэл бодлоо илэрхийлснийхээ төлөө эрхээ хасуулах ёсгүй. Үүнд анхаараач ээ. Тэр хүнд ямар тусламж үзүүлж байна вэ" хэмээн асуулаа. 

Харин түүний асуултад ШШГЕГ-ын дарга Д.Загджав "Бид хүний эрхийг зөрчихгүй байх талаас бүхий л боломжийг эрэлхийлж, камерын хяналтад байлгаж, жижүүрлэж ажилладаг. Нийгмийн асуудал хариуцсан ажилтан, сэтгэл зүйч ажилладаг.

Иргэн Э.Одбаяр 17 дахь өдрөө нойтон өлсгөлөн зарлаж байна. Биеийн байдал нь хэвийн, даралт 100/70-тай байгаа. Жингийн алдагдал 10 гаруй кг болсон. Өөртэй нь уулзаж, гэр бүлийнхэнтэй нь харилцаж байгаа. Өлсгөлөнгөө зогсоохгүй гэсэн. Түүнийг эмнэлгийн хяналтад байлгаж байна" хэмээн хариулав.