Нийслэлд 2021 оны хоёрдугаар ээлжийн буюу намрын цэрэг татлага өнөөдрөөс эхэллээ. Цэрэг татлага аравдугаар сарын 21-24-ны хооронд явагдана.

"Дэлхий нийтийг хамарсан цар тахал, коронавирусийн халдварын улмаас 2021 оны Нэгдүгээр ээлж буюу хаврын цэрэг татлага явагдаагүй. Дэлхий нийт, улс орны хэмжээнд халдвар тархсан ийм нөхцөлд цэрэг татлагыг зохион байгуулахын тулд нэлээд нарийн зохион байгуулалттайгаар, халдвар хамгааллын дэглэмийг барьж, Улсын онцгой комиссоос гаргасан шийдвэр, зөвлөмжийн хүрээнд бүртгэнэ" хэмээн Цэргийн штабын батлан хамгаалах хууль тогтоомж, хяналт шинжилгээ хариуцсан ахлах офицер, хурандаа М.Мөнгөнтулга мэдээлж байв.

Ингээд цэргийн зарлан дуудах хуудас авсан болон ирэх жилүүдэд цэргийн алба хаах залуусдаа зориулж дараах мэдээллийг хүргэж байна.

• Монгол Улсын иргэн Үндсэн хуулиар цэргийн алба хаах үүрэг хүлээсэн байдаг. 

• Нийслэлийн есөн дүүргийн цэрэг татлагын товчооны байранд цэргийн зарлан дуудах авсан иргэд биечлэн очно.

• Залуус цэрэг татлагын байранд эрүүл мэндийн үзлэгт орно. 

• Одоо хүчин төгөлдөр мөрдөж буй хуулиудад оюутныг чөлөөлөх заалт байхгүй тул оюутнууд зарлан дуудах бичгийн дагуу цэрэгт татагдана.  

• “Оюутан цэрэг” хөтөлбөр цар тахлын улмаас хойшлогдсон байгаа бөгөөд цаашид үргэлжлэх эсэхийг Засгийн газар шийднэ. 

• Гадаадад суралцахаар болсон, гадаад руу явах, эсвэл өвчтэй, ар гэрийн гачигдалтай, албан томилолтын улмаас цэрэг татлагын өдөр эзгүй байх иргэд цэрэг татлагын байранд урьдчилан очиж уулзах ёстой. 

• Хүндэтгэн үзэх шалтгаангүйгээр цэрэг татлагаас ямар нэг байдлаар оргон зайлбал Эрүүгийн хуулийн дагуу хариуцлага хүлээх хуулийн заалттай байдаг.

• Цэргийн албаны тухай хуулийн зарим заалтуудын хүрээнд хүндэтгэн үзэх шалтгаанаар цэрэг таталгаас чөлөөлдөг байна. Хэрвээ коронавирус туссан тань батлагдсан тохиолдолд цэргийн албаны татлагаар оруулахгүй. Заавал аль нэг шинжилгээний цэгт өгсөн хариугаар баталгаажих болно.

• Төрийн албаны тухай хуулийн өөрчлөлттэй холбоотойгоор Их, дээд сургууль төгссөн хүмүүс цэргийн албыг өөрийн хүсэлтээр хаадаг болжээ. Учир нь тус хуулиар Төрийн албанд ажиллахын тулд цэргийн алба хаасан байх шаардлагатай байдаг.

• Нийслэлийн есөн дүүргийн хэмжээнд нийтдээ 20,000 гаруй зарлан дуудах хуудас тараагджээ.

Дүүргүүдийн цэрэг татлагын байршил:

1. Баянгол дүүрэг – “Оюуны ундраа” цогцолбор сургууль /96-р сургууль/

2. Баянзүрх дүүрэг – Ерөнхий боловсролын 14-р дунд сургууль

3. Сүхбаатар дүүрэг – Ерөнхий боловсролын 31-р дунд сургууль

4. Сонгинохайрхан дүүрэг – “Өнөр” цогцолбор сургууль /83-р дугд сургууль/

5. Хан-Уул дүүрэг – Ерөнхий боловсролын 34-р дунд сургууль

6. Чингэлтэй дүүрэг - Ерөнхий боловсролын 34-р дунд сургууль

7. Налайх дүүрэг -Мэргэжлийн сургалт, үйлдвэрлэлийн төв

8. Багануур дүүрэг – “Гүн галуутай” цогцолбор сургууль

9. Багахангай дүүрэг – “Хангай” цогцолбор сургууль