Өнөөдөр Эдийн засгийн Байнгын хорооны хуралдаанаар Дарханы замын бүтээн байгуулалтын явцын талаар мэдээлэл сонслоо. Дарханы замыг 2022 оны Аравдугаар сард ашиглалтад оруулна хэмээн мэдээлж байгаа билээ.

Энэ талаар УИХ-ын гишүүн Г.Дамдинням "Хэзээ дуусах талаар тодорхой хэлж мэдэхгүй байна. Дарханы зам нь монголын босоо тэнхлэгийн гол зам. Зам засварын ажил эхлээд 3 жил болсон ч 50 хувьдаа хүрээгүй явж байна. Монголын ард түмний нэрийн өмнөөс АХБ болон Европын хөгжлийн сэргээн босголтын банкнаас хэдэн зуун сая долларын зээл авч хийж байгаа. Тухайн үед ЗТХ-ны дэд сайд байсан Л.Халтар өнөөдөр салбарын сайд болоод өдийг хүртэл хариуцаад явж байна. 

Одоогоор оролцогч гурван тал байна. Азийн Хөгжлийн банк, Монгол улсын Засгийн газар, гүйцэтгэгч компаниуд гээд. Эндээс ямар асуудал үүсдэг вэ гэхээр ЗТХЯ-тай харилцахад хэцүү. Дуудхаар ирдэггүй, Байнгын хороо дээр асуулт асуухаар гараад явчихдаг, бичгээр асуулт тавихаар шал өөр юм хариулдаг. 

Энэ замын ажлын 50 хувийг ямар ч тоног төхөөрөмжгүй, ажилчингүй, чадваргүй компанид өгсөн. Хоёр жил боллоо. Захиалагч болох ЗТЯ-наас хэн энэ тендерийг, ямар шийдвэрээр өгсөн юм, хохирлоо тооцсон уу, нэхэмжилсэн үү гээд асуухаар "ямар нэг хохирол тодорхой байхгүй байгаа учраас яаж шалгуулах учраа олохгүй байна" гэж хариулаад суух сайдтай байж байна. 

Баянчаньдманаас-Урьхан, Баруун хараагаас-Хонгор хүртэлх хэсгийн түр замынх нь асуудлыг одоо болтол шийдээгүй байна. Иргэд ирэх хавар энэ хоёр хэсэг дээр мөн ч их зүдэрнэ дээ. 

Маш товчхон хэлэхэд, нийт 10 багц ажлын 3 нь дуусах тийшээгээ хандаж байна. Ирэх оны 10 сард ашиглалтад орж амжихгүй байх. Тухайн тойргоос сонгогдсон гишүүдтэйгээ нийлэн Ажлын хэсэг байгууллахаар болсон. 

Сайд Л.Халтар зохион байгуулалтаа хийж чадахгүй байна. Коронавирусийн асуудалгүй газар алга. Энэ бол шалтаг биш шүү дээ. Бодит байдал ийм л байна. Салбарыг хариуцаж байгаа бол хариуцсан шиг хариуцах хэрэгтэй байна" гэлээ.