БНХАУ-ын Эрээн хот "Ковид-19" халдварын улмаас өнөөдрөөс /2021.10.14/ эхлэн тодорхойгүй хугацаагаар хөл хорио тогтоолоо. Ингэснээр Замын-Үүд, Эрээний боомт түр хугацаагаар хаагдаж байгаа тул БНХАУ-ын Эрээн хотод суугаа консул Т.Мөнхгэрэлээс үүссэн нөхцөл байдлын талаар тодруулсан байна.

Түүний мэдээлснээр хөл хорио хэд хоног үргэлжлэхийг урьдчилан хэлэх боломжгүй, дүүрэг дүүргээр нь түр хаасан байдалтай байгаа. Сургууль цэцэрлэг, албан байгууллагууд өнөөдөр ажиллаагүй. 12:00 цагаас эхлэн бүх иргэдээс PCR шинжилгээ авч эхэлсэн. Эхний шинжилгээний хариу гарсны дараа хөл хориог хэд хоног тогтоох вэ гэдэг асуудлыг шийдэх аж.

Хилийн бүс дээр ачаа тээвэр оруулж гаргадаг, хил гааль дээр ажилладаг бүх ажилчид шинжилгээнд хамрагдах тул өнөөдөр ачаа тээврийг хилээр оруулж, гаргахгүй. Шинжилгээний хариу нааштай гарвал маргаашаас шийдвэр өөрчлөгдөж магадгүй гэв.

Халдвар гарсан шалтгааны талаар Хятадын хэвлэл мэдээллийн хэрэгслээр "Монголоос ачаа тээвэр хийдэг “Хуй Тун” хэмээх ложистик төвд коронавирусийн халдвар гарсан" хэмээн мэдээлжээ.