Ерөнхийлөгч У.Хүрэлсүх өнөөдөр Төрийн ордонд болж буй Нийт шүүгчийн чуулганд оролцож үг хэллээ.

Тэрээр "Цар тахал, эдийн засгийн хүндрэл, хөрөнгө санхүүгийн хомсдол гээд хүндрэлтэй асуудал олон байгаа хэдий ч Монголын төр засаг шүүхийн байр, материаллаг баазыг бэхжүүлэх асуудлыг дэс дараалалтайгаар шийдвэрлэх нь зүйтэй гэж үзэж байна. Шүүхийн байрыг шийдэх асуудал бол угтаа Үндсэн хуульд заасан иргэний шударга шүүхээр шүүлгэх эрхийн баталгааг хангаж буй асуудал болохоос биш шүүгчийн эрх ямбыг нэмж буй асуудал огт биш юм.

Иймээс Төрийн тэргүүний хувьд Улсын Дээд шүүхийг улсынхаа төв талбайн баруун талд байрлан үйл ажиллагаагаа явуулаасай хэмээн хүсэж байна. Энэ талаар миний бие Засгийн газарт холбогдох чиглэлийг өгсөн. Засгийн газар уг асуудлыг нааштай шийдвэрлэнэ гэдэгт итгэж байна" гэв.

Засгийн газрын хуралдаанаас гарсан шийдвэрээр Улаанбаатар хотын захиргааг 2021 оны Арванхоёрдугаар сарын 31-ний дотор Яармаг руу нүүлгэн шилжүүлэх үүргийг Хотын дарга Д.Сумъяабазарт өгсөн. Харин Хотын дарга тийш нүүхгүй гэдгээ хэд хэдэн удаа хэлээд авсан билээ. 

Дашрамд, Нийслэлийн Засаг захиргааны шинэ байр ашиглалтад орж байгаатай холбоотойгоор “Хангарди” ордны барилгыг хувьчлах шийдвэрийг НИТХ-аас хоёр жилийн өмнө гаргасан байдаг. Шийдвэрийн дагуу нээлттэй дуудлага худалдаагаар хувьчлах зар түгээсэн ч "Хангарди" ордны дараагийн эзэмшигч одоог хүртэл тодорхойгүй хэвээр байгаа аж.

Энэ талаар Нийслэлийн Засаг даргын орлогч Ж.Сандагсүрэн "Хангарди ордныг дуудлагаар худалдаалах шийдвэр гарч, 2020 онд зохион байгуулах ёстой байсан боловч тодорхой шалтгаануудын улмаас шийдэгдээгүй, анхны үнэлгээг 46 тэрбум төгрөгөөр тогтсон байгаа. Нийслэлийн одоогийн байр бол нийслэлийн өмч. Үүнийг хэрхэхийг НИТХ-аас шийдвэрлэнэ" гэж тайлбарлаж байв.

Нийслэлийн Засаг захиргааны "Хангарди" ордонд нийслэлийн 14 газар, агентлаг үйл ажиллагаа явуулдаг бөгөөд нийт 9774.7 ам.метр талбайтай 15 давхар барилга юм.