#NoDoubleStandart хөдөлгөөнийг зохион байгуулагчдын нэг Д.Монголхүүг энэ сарын 5-ны өдөр албадан баривчилж, цагдан хорьсон ч суллах шүүхийн шийдвэр өчигдөр гарсан.

Харин түүнийг өнөөдөр дахин цагдан хорихоор болсон байна. Тодруулбал, прокурорын байгууллагаас Сүхбаатар дүүргийн Эрүүгийн хэргийн анхан шатны шүүхийн Ерөнхий шүүгчид гомдол гаргажээ. Уг гомдлыг өнөөдөр хэлэлцээд Д.Монголхүүг цагдан хорих шийдвэр гаргасан байна. 

Иргэн Д.Монголхүү цагдан хорих 461-р анги явахаасаа өмнө дараах мэдэгдлийг цахим орчинд үлдээжээ. 

Тэрээр "Шүүхээс намайг үргэлжлүүлэн 30 хоног цагдан хорих шийдвэр гаргасан байна. Өнгөрсөн хугацаанд бид нэг зүйл шаардаж байгаа. Хууль дээдлэх, хуулийн эрх тэгш байдлыг шаардаж байсан. Би ямар нэгэн байдлаар шүүхийн шийдвэрийг эсэргүүцэж, оргон зайлахгүй. Би монгол улсын иргэн хүн. Хуулийн дор амьдардаг хүн, хуулиа сахина. Өнгөрсөн хугацаанд цагдаа нараас хуулиа хэрэгжүүлэхийг шаардаж байсан. Өчигдөр миний гар утас 461-р ангиас гарч ирэх үеэд алга болсон. Одоо хаана байгаа нь мэдэгдэхгүй, олдохгүй байна. 

Бид хууль дээдлэх зарчим шаардаж байгаа тул хуулиа л сахина. Бид нарт байгаа цорын ганц байгаа үнэт зүйл бол эрх чөлөө. Эрхээ мэддэг хүн олон байгаасай гэж хүсэж байна. Ардчилсан Монгол улсын иргэдээ өөрийнхөө эрх, эрх чөлөөг мэдээд, үнэлээд, хайрлаад явах нь бидний цорын ганц баялаг шүү" хэмээсэн байна.

Иргэн Д.Монголхүү нь "Хүн бүр тэгш эрхтэй байх ёстой, ковидын хууль даргад нэг өөр, иргэнд нэг өөр үйлчилдэг байж болохгүй" хэмээн тэгш эрхийг шаардан #NoDoubleStandart хөдөлгөөнийг эхлүүлж, үзэл бодлоо илэрхийлсээр байгаа юм.