Монгол Улсын Хүний эрхийн Үндэсний Комиссоос тусгаарлан ажиглах арга хэмжээ нь хүний эрхэд хязгаарлалт тогтоож байгаа хэлбэр мөн гэдгийг мэдээлсэн. УОК-оос цар тахал тархаж эхэлсэн үеэс эхлэн хилийн гаднаас ирсэн иргэдийг 21 хүртэлх хоног тусгаарлан ажиглаж байсан бөгөөд үүнийг хэрэгжүүлж байсан 6 удаагийн акт нь хуульд зааснаар хүчин төгөлдөр болоогүй байжээ. 

Иймд ХЭҮК-оос тусгаарлалтанд байж хохирсон иргэдийн хохирлыг нөхөн төлөх албан шаардлагыг Монгол Улсын Шадар сайд, Улсын онцгой комиссын дарга С.Амарсайханд хүргүүллээ.

Манай Улсад Ковид-19 анхны тохиолдол бүртгэгдсэнээс эхлэн гадаадаас ирж буй иргэдийг эмнэл зүйн шинж тэмдэг илэрсэн эсэхээс үл хамаарч тусгаарлах байранд болон гэрт нь тусгаарлан ажиглах дараах хугацаа тогтоосон УОК-ийн шийдвэрүүд Монгол Улсын Үндсэн хуулийн Арван есдүгээр зүйлийн 2 дахь заалт, Арван зургаадугаар зүйлийн 13 дахь заалт, Захиргааны ерөнхий хуулийн 4 дүгээр зүйлийн 4.2 дахь хэсэг, Коронавиурст халдвар /Ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн 11 дүгээр зүйлийг зөрчсөнийг тогтоож өглөө.

1. 2020.03.14 /анхны тохиолдол/-ны өдрөөс 14+14=28 хоног

2. 2020.03.26 /тохиолдол 11/-ны өдөр 21+14=35 хоног

3. 2020.04.09 /тохиолдол 16/-ний өдөр 21+14=35 хоног

4. 2020.09.14 /тохиолдол 311/-ний өдөр 21+0=21 хоног

5. 2020.12.09 /тохиолдол 893/-ний өдөр 14+7=21 хоног

6. 2021.02.25 /тохиолдол 2,801/-ний өдөр 10+4=14 хоног

7. 2021.05.07 /тохиолдол 43,201/-ний өдөр 7+7=14 хоног

8. 2021.06.24 /тохиолдол 102,629/-ний өдөр 7 хоног

Өмгөөллийн Фиделитас Партнерс /Fidelitas Partners/ хуулийн фирмийн баг Open Society Forum-ийн Хохирлыг шударгаар барагдуулах үндэсний тогтолцоо бүрдүүлэх, бэхжүүлэх нийтийн эрх ашгийн өмгөөллийн тэтгэлэгт хөтөлбөрт “Ковид-19 цар тахлын үед захиргааны хууль бус шийдвэрийн улмаас иргэнд учирсан хохирлыг барагдуулах” төсөл хэрэгжүүлж байгаа ба иргэн Б.Баялагмаагийн 21+14=35 хоног тусгаарлагдсан кейс дээр ийнхүү хариу авлаа.

Тус хуулийн фирмээс шүүхэд гаргасан нэхэмжлэлийн шаардлага бүрэн хангагдах хүртэл өмгөөллийн ажлаа үргэлжлүүлэх болно гэдгээ мэдэгдэв.