Монгол улс шатахууны хямралд өртөж, бензины оочирлосон урт дараалал үүссэн өдрүүд үргэлжилж байна. 

Өнгөрсөн бямба гаригт Ашигт малтмал, газрын тосны газрын орлогч дарга Ц,Эрдэнэбаяр шатахуун импортлогч компаниудтай уулзалт хийж, өнөөдрөөс шатахууны борлуулалтыг хэвийн горимд оруулах үүрэг чиглэлийг өгсөн гэсэн юм.

Мөн цаашид аж ахуйн нэгжүүдтэй хамтран БНХАУ-аас шатахууны татан авалтыг нэмэгдүүлэх чиглэлээр ажиллах аж.

Одоогоор Хөх хотын нефть боловсруулах үйлдвэрээс эхний 150 вагоныг нийлүүлж байгаа бөгөөд Есдүгээр сарын 26-ний өдөр “Лекс ойл” компанийн захиалгат 38 вагон, “Шунхлай” компанийн 12 вагон ачаа Замын Үүд өртөөнд орж иржээ.

Уг шатахууныг Замын Үүдийн шингэн түлш шилжүүлэн ачих байгууламжаар дамжуулан хангалтын вагонцистернүүдэд шуурхай ачилт хийхээр ажиллаж байна. Тодруулбал, Улаанбаатар төмөр замын эзэмшлийн 28 вагонцистернээс гадна “Лекс ойл” компанийн 70 гаруй вагоныг ашиглан тээвэрлэж Замын-Үүдэд авчран нийслэл рүү шат дараатай илгээх арга хэмжээ авч ажиллаж байгаа юм.

“Лекс ойл” компани нь БНХАУ-ын вагонуудын ачааг түргэн буулгах, шатахууны хангалтыг хэвийн болгох, шатахуун борлуулагч аж ахуйн нэгжүүдийн нөөцийг бүрдүүлэх боломжийг хангах зорилгоор Замын-Үүд өртөөнд 24000 м.куб багтаамжтай газрын тосны бүтээгдэхүүн хадгалах агуулахыг нарийн болон өргөн царигийн салбар төмөр замын хамтаар барьж байгуулж байгаагийн зэрэгцээ дотоодын тээвэрлэлтийг шуурхай зохион байгуулах, ачаа эргэлтийг түргэсгэхээр 100 гаруй вагонцистернээр тээвэрлэлтийг хийх бололцоог ААН-үүдэд бүрдүүлэн өгч байна.