Монголын боксын холбооноос цаг үеийн асуудлаар мэдээлэл хийлээ.

Монголын боксын холбоо өнгөрсөн ням гаригт хурлаа хийж ерөнхийлөгч болон удирдах зөвлөлийн гишүүдээ сонгосон билээ.

Шинэ гүйцэтгэх зөвлөл хоёр дахь хурлаа хийж хэд хэдэн асуудлыг шийдвэрлэсэн бөгөөд үүний дунд зарим тамирчныг шигшээ багаас хасах шийдвэрийг гаргасан байна. 

Мөн удахгүй болох эрэгтэй боксын ДАШТ-д оролцох тамирчдын сорилго шалгуур, шүүгчдийн бүрэлдэхүүнийг баталсан байна.

Энэ талаар Боксийн холбооноос "Гавьяат тамирчин Э.Цэндбаатар удаа дараа сахилга бат, ёс суртахууны зөрчил гаргасан тул түүнийг шигшээ багаас хасаж, ДАШТ-д оруулахгүй байхаар шийдвэрлэсэн.

Дэлхийн аварга маш ойрхон дөхсөн байхад шигшээ багийн гишүүн шөнийн 2 цагт архи уугаад явж буй нь буруу юм. Мөн энэ удаагийн үйлдэл нь анхны удаа биш бөгөөд ийм шийдвэр гаргахаас өөр аргагүй байсан. Хөдөлмөрийн баатар, гавъяат байх нь хамаагүй, цаашид улам хатуу сахилга бат, ёс зүйтэй байна. Цагдаагийн асуудал цагдаа дээрээ шийдэгдэнэ. Зодоон нүдээгийг тэнд шийднэ. Бид нар тамирчны ёс зүйг ярина. Боксийн холбооны удирдлагийн шинэ бүрэлдэхүүн өмнөх асуудлыг сөхөөгүй, мэдэхгүй" гэлээ.

Харин Боксийн холбооны зөвлөлийн гишүүн Э.Бадар-Ууган "Сайн тамирчнаа алдлаа гээд байх шиг байна. Спорт нэг хүнээр дутдаггүй. Энэ бол спортын ардчилал. Ямар нэг тамирчныг бурхан шиг шүтдэггүй. Хоёр, гурав дахь тамирчдыг бэлэн байлгаж, бэлдэж байдаг. Спорт тэр дундаа боксийн спорт хатуу. Маш их сахилга бат, диктатуртай байх ёстой. Энэ шийдвэр цааш цаашдын тамирчдад ч хамаатай" гэлээ.