ХӨСҮТ болон эрдэмтдийн зөвлөлөөс халдварын нөхцөл байдалтай холбоотойгоор шөнийн 22:00 цагаас хойш хатуу хөл хорио тогтоох санал гаргажээ.
Улсын хэмжээнд сүүлийн 10 хоногт өдөрт дунджаар 3500 гаруй хүн халдвартай бүртгэгдэж байна. Есдүгээр сарын 8-ны байдлаар нийт 19,440 хүн эмнэлэгт хэвтэн эмчлүүлж байгаа юм.
Монгол Улсын хэмжээнд төрийн өмчийн хоёр болон гуравдугаар шатлалын эмнэлэг, бүсийн оношилгоо эмчилгээний төв, аймаг дүүргийн нэгдсэн эмнэлэг гээд нийт 20 гаруй мянган орны нөөцтэй. Халдварын хоёр дахь давалгааны үед орны ачаалал хэтэрсэн талаар ЭМЯ мэдээлж байсан бол өнөөдөр тухайн үетэй харьцуулахад өдөрт бүртгэгдэх халдварын тохиолдол 1000 гаруйгаар илүү байгаа юм.
ХӨСҮТ болон эрдэмтдийн зөвлөлөөс оройн цагаар хатуу хөл хорио тогтоовол халдварын тархалт тодорхой хэмжээнд буурна гэж үзсэн байна. Ялангуяа, 22:00 цагаас хойш хөдөлгөөн эрчимжиж, олон хүн цуглаж, найр наадам хийх нь ихсэж байгаа тул ийнхүү санал гаргажээ.
