Тэтгэвэр, тэтгэмжийг нэмэхийг шаардаж буй иргэдийн түр хорооноос хэвлэлийн бага хурал хийлээ.

Тэд "Өргөн хэрэглээний барааны үнийн өсөлттэй уялдуулж тэтгэвэр, тэтгэмж нэмдэг тогтолцоотой болъё" хэмээн шаардлага хүргүүлж байна.

Өндөр настан "Дэлхий нийтээрээ коронавирус хэмээх цар тахалд нэрвэгдээд байна. Бид ч мөн үүнд хөл алдахгүй амьдарч байна. Эрх баригчид өдөр хоног аргацаасан шийдвэрээр явж байна. Төрийн мөнгө гэж байхгүй. Татвар төлөгчдийн мөнгө л гэж байгаа. Хулгайч нарын мөнгийг хурааж ядарсан иргэддээ тарааж өг. Эрх баригчдад тэтгэвэр нэмэх боломж бүрэн бий. Тэтгэврийг 600 мянга болгохыг шаардаж байна. Улсад хийдгээ хийсэн, насаа илээсэн надад хөрөнгөжсөн коммунистуудаас айх зүйл байхгүй" гэлээ. 

Иргэн н.Хажидмаа "Өнөөдөр Ерөнхий сайд нь хөшөө барьж, нурааж тоглож байна. УИХ-ын гишүүн асан Б.Ундармаа яагаад 350 тэрбум төгрөгийг улсад буцааж төлөхгүй байгаа юм бэ?! Тэтгэвэр тэтгэмжээ нэмэхийг шаардаж байна. Монгол улсад өнөөдөр иргэд энэ ковид гэдэг өвчнийг оруулж ирээгүй. Маш олон жирмэсэн ээжүүд энэ өвчнөөс болоод ургаа алдаж байна. Цусаар уйлж байна. Гэтэл Ерөнхийлөгч, Ерөнхий сайд нар нь сонгуулиар өвчилж, иргэдээ хайхрахгүй байна.

Хувь тэнцүүлсэн тэтгэвэр 255 мянган төгрөг, хөгжлийн бэрхшээлтэй иргэд сард 188 мянган төгрөгөөр амьдарч байна. Иргэд дөрвөн удаагийн хөл хорионд орж, иргэдийн амьдрал доройтож байна. Тэтгэвэр, тэтгэмжийн доод хэмжээг 600 мянган төгрөг болгохыг шаардаж байна. 

Цалин тэтгэвэр, тэтгэмж нэмэгдүүлэх шаардлагаа Ерөнхий сайдад хүргүүлнэ.

Гурав хоногт хариу өгөхгүй бол Сонгинохайрхан дүүргээс эхлэн иргэдийн цалин, тэтгэвэр, тэтгэмжийг нэмэгдүүлэх шаардлага байна уу?! гэсэн сэдвээр иргэдийн дунд санал асуулга явуулна" гэлээ.