"Токио-2020" зуны Паралимпын наадамд оролцсон тамирчид эх орондоо ирлээ.
Пауэрлифтингийн 107 кг-ын жинд алтан медаль хүртсэн Монгол Улсын гавьяат тамирчин Э.Содномпилжээ 245 кг-ын жинг амжилттай өргөж, Паралимпын наадмын дээд амжилтыг тогтоож, алтан медаль хүртсэн билээ.
Тэрээр "Жиндээ нэгд явж байсан учраас сэтгэлзүй өндөр, бэлэн байсан. Мөн 250 кг-ыг өргөнө гэсэн бодолтойгоор орсон, боломж 100 хувь байсан. Дасгалжуулагчдаа, Монголын шигшээ багийнхандаа баярлалаа. Парисын Олимп болоход гуравхан жил үлдсэн байна. Ард түмнээ баярлуулахын төлөө хичээнэ" хэмээлээ.
Харин дасгалжуулагч Д.Баттулга "Эхлэх жингээ олон өдөр бодож, тооцоолсон. 243 кг-аар ч эхлэх боломжтой байсан. Арын тамирчдын захиалгаас их хамаарсан. Манай тамирчин өнгөрсөн зургаадугаар сард ковид тусч, 14 хоног эмнэлэгт хэвтсэн. Их сульдсан, хүч алдсан. Халдвар аваагүй байсан бол 245 кг-аар эхэлж, хоёр дахь оролтоо 250 кг-аар хийх өндөр бодолтой байсан. Олимп их хатуу байдаг юм байна" гэсэн юм.
