Нийслэлийн Зам, тээврийн асуудал хариуцсан төслүүдийн удирдагч Б.Одсүрэн нийтийн тээврийн хэрэгслийн гадна талд байрлуулсан зарим сурталчилгааны зургийг хуулуулсан тухайгаа цахим хуудаснаа нийтэлсэн. Түүний энэхүү үйлдэл нь бэлгийн чиг баримжаа өөр хүмүүсийг ялгаварлан гадуурхсан байж болзошгүй шинжтэй байсан юм.

Тодруулбал, нийтийн тээвэр дээр байршуулсан сурталчилгаа хуулуулсан шалтгаанаа хүүхдийн тоглоомтой холбон тайлбарлаж, сүүлийн үед багачуудын сонирхох болсон тоглоомын өнгө нь ижил хүйстнүүдийн билэгдэлтэй ижил учир ийм алхам хийсэн гэсэн байв.

Олон нийтийн зүгээс дургүйцлээ илэрхийлсэн тул тэрээр өөрийн постыг устгажээ.

Тэгвэл Монголын ЛГБТ төвөөс тус төрийн албан хаагчийн үйлдэлд холбогдуулан Сүхбаатар дүүргийн цагдаагийн 1-р хэлтэст гомдол гаргажээ.

ЛГБТ төвийн Эрх зүйн хөтөлбөрийн менежер Д.Эрдэнэбүрэн "Монгол улсад мөрдөгддөг хууль тогтоомжийг сурталчилсан агуулга бүхий хуудаснуудыг хууль ёсныхоо дагуу гэрээ хийж байрлуулсан. Гэтэл манай гэрээ хийж байрлуулсан хуудасны буулгах хугацаа дуусаагүй байхад хуулсан. Сурталчилгааг буулгах мэдээлэл манайд ирээгүй. Гэрээний дагуу есдүгээр сарын 10 хүртэл байрших сурталчилгаа байсан. Бидний гомдлыг хууль ёсны дагуу шийднэ гэдэгт итгэлтэй байна. Монгол улс ЛГБТ хүмүүсийг хамгаалдаг хүний эрхийн мэдрэмжтэй орнуудын тоонд ордог" гэв.

Монголын ЛГБТ төв нь энэ жил автобусны буудал болон 18 чиглэлийн автобусанд "Тэгш эрхийн бахархлын өдрүүд"-д зориулсан мэдээллийг байршуулаад байжээ.

Монгол Улсын Үндсэн хуулийн 14.2т "Хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно. Хүн бүр эрх зүйн этгээд байна" гэж заасан байдаг.

Мөн Эрүүгийн хуулийн 14.1т "Хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсрол, бэлгийн, хүйсийн чиг баримжаа, эрүүл мэндийн нөхцөл байдлаар ялгаварлан гадуурхаж эрх, эрх чөлөөг нь хязгаарласан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ" гэж заасан байдаг. 

Төрийн албан хаагчийн энэхүү ялгавартай хандлагад иргэд дүргүйцэж, хариуцлага тооцохыг шаардаж эхэллээ.