“Цэргийн цол олгох журам”-д өөрчлөлт оруулахаар болжээ.
Энэ талаар Батлан хамгаалахын сайд Г.Сайханбаяр цахим хуудсаараа дамжуулан мэдээллээ.
Тэрээр "Спорт, урлагийнханд цэргийн цолыг хавтгайруулан олгож байгаад иргэд, олон нийт шүүмжлэлтэй ханддаг. Иймд “Цэргийн цол олгох журам"-д өөрчлөлт оруулахаар ажиллаж байна" хэмээжээ.
Тодруулбал, Монгол Улсын Ерөнхийлөгчийн захирамжаар “Цэргийн цол олгох журам”-ыг шинэчлэн боловсруулах ажлын хэсэг байгуулагдан ажиллаж эхэлсэн байна.
Монголд цэргийн цолыг хавтгайруулан олгох явдал хэрээс хэтэрсэн гэж иргэдийн зүгээс шүүмжлэлтэй ханддаг. Өөрийн сонгосон замналдаа амжилт гаргасан спортынхон, урлагийнхан тэр дундаа үндэсний бөхчүүдэд цэргийн цолыг хавтгайруулан олгодог. Тэгвэл журамд өөрчлөлт оруулснаар энэ байдал өөрчлөгдөх ажээ.
Цэргийн цол бол зэвсэгт хүчний цэргийн албан хаагчид, цэргийн бэлтгэл үүрэгтнүүдэд албан тушаалын байдал, цэргийн болон тусгай бэлтгэл, зэвсэгт хүчинд алба хаасан хугацаа, байгуулсан гавьяанд тохируулан тэдэнд тухайлан олгодог цол юм.