Ерөнхийлөгч У.Хүрэлсүхийн зарлигаар Элсэлтийн ерөнхий шалгалтад хамгийн өндөр оноо авсан төгсөгчид болон дэлхийн шилдэг их, дээд сургуулийн бакалаврын хөтөлбөрт хамрагдах болсон иргэдэд сургалтын тэтгэлэг олгохоор болжээ.

Энэ талаар Ерөнхийлөгчийн Тамгын газрын дарга Я.Содбаатар танилцууллаа.

Тэрээр "2021 оны олимпиадуудад Монгол хүүхдүүд амжилттай оролцсон. Ерөнхийлөгчийн зарлигт 2021 оноос эхлэн олон улсын олимпиадад амжилт үзүүлж, медальт байранд шалгарсан сурагчдад тухай бүрд нь Монгол Улсын Ерөнхийлөгчийн нэрэмжит урамшууллыг нэг удаа олгохоор тусгасан байгаа. 

Зөвхөн 2021 онд Монгол Улсын математикийн баг олон улсын олимпиадаас хоёр алт, хоёр мөнгө, хоёр хүрэл медаль, физикийн олимдиадаас хоёр хүрэл, хоёр шагналт байр, мэдээлэл зүйн олимпиадаас нэг мөнгөн медаль, химийн олимпиадаас хоёр мөнгө, нэг хүрэл медаль, нэг шагналт байр, биологийн олимпиадаас нэг мөнгө, хоёр хүрэл медаль буюу нийт таван олимпиадаас 15 медаль, гурван шагналт байр эзэлсэн амжилт үзүүлээд байна.

Ялангуяа Монгол Улсын математикийн баг дэлхийн 107 орноос 11-д эрэмбэлэгдсэн” гэлээ.

Ерөнхийлөгч У.Хүрэлсүхийн зарлигт:

Нэг, Монгол Улсын сум, дүүрэг, хороо бүрийн төлөөллийг жигд хангаж тухайн жилийн элсэлтийн ерөнхий шалгалтад харьяалах сум, дүүрэгтээ хамгийн өндөр оноо авсан тус бүр нэг иргэнийг сонгон шалгаруулж дотоодын төрийн өмчийн их, дээд сургуулийн дэлхийн шилдэг их сургуульд суралцуулах тэтгэлэгийн бэлтгэл хөтөлбөрт элсүүлэх,

Хоёр, тэтгэлэгийн бэлтгэл хөтөлбөрийн амжилттай төгсөж, дэлхийн шилдэг их сургуулийн бакалаврын үндсэн хөтөлбөрт суралцах эрх авсан иргэнд тэтгэлэг олгох,

Гурав, Олон улсын олимпиадын медальт байранд шалгарч, олон улсын эрх бүхий байгууллагын тогтоосон зэрэглэлээр дэлхийн шилдэг 100-д багтсан их, дээд сургуулийн бакалаврын үндсэн хөтөлбөрт хамрагдах эрх авсан иргэнд сургалтын тэтгэлэг олгох,

Дөрөв, Монгол Улсын иргэдийн Ерөнхийлөгчийн нэрэмжит тэтгэлэгээр дэлхийн шилдэг их, дээд сургуульд суралцуулахад шаардагдах зардлыг жил бүр улсын төсөвт тусган хэрэгжүүлж байх,

Тав, тэтгэлэгт хөтөлбөрт хамрагдан, дэлхийн шилдэг их, дээд сургуульд амжилттай суралцан төгссөн Монгол Улсын иргэнийг эх орондоо ирж ажиллах, ажлын байраар хангахтай холбоотой асуудлыг холбогдох хууль тогтоомжид тусган, зохион байгуулах,

Зургаа, Монгол Улсын Ерөнхийлөгчийн нэрэмжит тэтгэлэгийн журмыг холбогдох хуулийн дагуу батлан гаргах зэрэг асуудлыг тусгажээ.

Дээрх зарлигийн дагуу Боловсрол шинжлэх ухааны яам холбогдох журмыг боловсруулан, Засгийн газрын маргаашийн хуралдаанаар хэлэлцэн батлуулахаар болжээ.