Боловсрол, шинжлэх ухааны яамнаас их, дээд сургуулийн элсэлттэй холбоотой асуудлаар мэдээлэл хийлээ.
Боловсрол, шинжлэх ухааны сайд Л.Энх-Амгалан "2021-2022 оны хичээлийн жилд 88 их, дээд сургуульд 147,299 оюутан суралцана. Үүний дотор хөдөө орон нутгаас 74,523 оюутан Улаанбаатар хотод ирж суралцана. Мөн улсын хэмжээнд 71 оюутны дотуур байр бий. Найман дотуур байрыг нь чөлөөлсөн. Дотуур байруудад 11,359 оюутан амьдардаг. Энэ боломжийг бид урьдын адил хангана" гэлээ.
Мөн их, дээд сургуулиудын төлбөрийн талаар "Энэ хичээлийн жилд төрийн өмчийн их, дээд сургуулийн төлбөр нэмэгдэхгүйг хариуцлагатайгаар хэлье. Ковидын хууль энэ оныг дуустал мөрдөгдөж байгаа тул өмчийн хэлбэр үл харгалзан сургуулиуд төлбөрийн хэмжээгээ нэмэхгүй байх чиглэл өгч байгаа. Мөн төлбөрийг бүтнээр нь авахгүй. Хичээл сонголтоор барьцаалж, төлбөр нэхэж байвал гомдлоо өгч болно" гэв.