Ерөнхий сайд Л.Оюун-Эрдэнэ Хэнтий аймгийн Батноров сум нь Их Эзэн Чингис хааны үнэнч анд, жанжин Боорчийн өлгий нутагт "Андлалын өргөө” цогцолборын ажлыг эхлүүлж, 2018 онд ашиглалтад хүлээлгэн өгсөн билээ. Тус цогцолбор нээлтээ хийснээс эхлүүлэн олон нийтийн дургүйцлийг хүргэж, цахим орчинд нийлээдгүй шоглуулах болсон юм. Төсвийн мөнгө уйлдаггүй ч, төсвөөр баригдсан хөшөө уйлах нь тэр. 

"Андлалын өргөө” цогцолборыг иргэд шүүмжилж эхлэхэд Ерөнхий сайд Л.Оюун-Эрдэнэ "Монгол улсын түүхийн эсрэг үйлдэл хийвэл улс төрийн хатуу тэмцэл хийнэ шүү" хэмээн мэдэгдэж, нээлтийн үеэр "400 сая жуулчин авчирна" хэмээн бардам дугарч байлаа. Тухайн үедээ өөрийгөө тооны алдаа гаргаагүй хэмээн гүрийж байв. 

Гэвч балаг дууссангүй “Андлалын өргөө” хөшөөний зураг нь Урлагийн гавьяат зүтгэлтэн, зураач Д.Эрдэмбилэг агсны бүтээл аж. Хөшөөний зургийг сошиалд янз бүрээр шоглон нийтэлж, зураачийн нэр хүндэд халдаж байгаа нь талийгаачийн гэр бүлд эмзэг тусжээ. Тийм учраас оюуны өмчийг ашиглуулахаас татгалзсан байна.

Нийтдээ 5.7 тэрбум төгрөгөөр хэмжигдэж 2 тэрбум төгрөгийг одоогийн бүтээн байгуулалтад зарцуулсан “Андлалын өргөө” цогцолборын ажил зогсонги байдалтай удаж байгаа. Барилгын ажил удаж байгаа шалтгаан нь цогцолборын гүйцэтгэгчээр ажилласан “Хос Санаа” ХХК барилгын ажлыг цааш гүйцэтгэх боломжгүй болсон учраас аж.

Оюуны өмчийн асуудалтай тулгарсан “Хос санаа” ХХК барилгын ажлыг цааш үргэлжлүүлбэл маргаантай нүүр тулах болсон учраас ажлаа зогсоохоор болсон байна. Улмаар улсаас тус компанийг хар жагсаалтад оруулж улсаас төсөвлөсөн мөнгийг эргүүлэн төлүүлэх шийдвэр гаргажээ.

Тодруулбал, гүйцэтгэгч компани зохиогчийн эрхийг эзэмшигч хоёрын дунд асуудал үүссэнээр энэ ажил цааш үргэлжлэх боломжгүй болж байгаа юм байна.

Нэгэнт оюуны өмчийн маргаан дэгдсэн учраас хөшөөг нурааж шинээр тендер зарлан дахин шинээр барихаар төлөвлөж байгаа гэх шуум яваад эхэлжээ. БОАЖ-ын сайд Ц.Уртнасан “Андлалын хөшөө” цогцолборт очин үүсээд байгаа нөхцөл байдалтай танилцан төслийг үргэлжлүүлэх аж ахуйн нэгжтэй гэрээ хийж магадгүй аж.

Жилдээ 400 сая жуулчин төвлөрүүлэх байсан түүхэн цогцолбор олны элэг доог болж, нэг ч жуулчин төвлөрүүлж чадалгүй төслийн ажлыг дахин шинээр эхлүүлэхээр болжээ.