Засгийн газраас “Монгол Улсын виз олгох журам”-ыг шинэчлэн баталсан билээ. Тус журам хуулийн хүрээнд Наймдугаар сарын 16-наас мөрдөгдөж эхлээд байна.

Журамд зааснаар Монгол Улсын визийн ангиллууд дараах байдлаар нэмэгдлээ.

Үүнд: 

• Дипломат

• Албан

• Хөрөнгө оруулах

• Хөдөлмөр эрхлэх

• Суралцах

• Гэр бүл

• Цагаач

• Хувийн

• Шашны болон түр ирэх зорилгоор гэж төрөлжүүлэн 64 ангиллын виз олгохоор болж байна.

Тухайлбал, соёл, урлаг, спортын тэмцээн уралдаан, арга хэмжээнд оролцох, контент бүтээх, импортын ачаа болон зорчигч тээвэрлэх, хил орчмын өдрийн аялал жуулчлалаар зорчих, дамжин өнгөрөх, эрүүл мэндийн тусламж, үйлчилгээ авах гадаадын иргэнд олгох шинэ төрлийн визийн ангиллууд нэмэгдсэн байна.

Ингэснээр визийн ангиллыг зорилго бүрээр нь нарийвчилж, тодорхой болгосноор гадаадын иргэн Монгол Улсын виз авах хүсэлтээ үнэн, зөв мэдүүлэх, өөрийн зорилгодоо нийцсэн визээр зорчих юм.

Мөн тус журмаар визийн зөвшөөрлийн хүчинтэй хугацаа, виз, визийн зөвшөөрөл олгохоос татгалзсан тохиолдолд дахин хүсэлт гаргах хугацаанд тус тус өөрчлөлт оржээ.

Тодруулбал, баримт бичгийг хуурамчаар бүрдүүлэн худал мэдүүлсэн тохиолдол визийн зөвшөөрөл олгохоос татгалзаж 30 хоногийн дараа дахин виз мэдүүлэх эрхтэй байсныг 180 хоног болгон өөрчилжээ.

“Монгол Улсын виз олгох журам”-ыг бүрэн эхээр нь ЭНД дарж авах боломжтой!