ОХУ-ын Сибирийн ойд гарсан түймрийн утаа Монгол орны тодорхой газар нутгууд, түүний дотор Улаанбаатар хотыг бүрхсэн хэвээр байна. 

Түймрийн утаа зүүн тийш нүүдэллэж Улаанбаатарт өнөө шөнөөс эхлэн арай багасах төлөвтэй байгаа ч цаашид зүүн аймгуудын нутаг болон бусад нутгаар олон хоног их, бага хэмжээгээр утаатай байх тул шаардлагагүй тохиолдолд гэрээсээ гарахгүй байх, алхалт хийхгүй байхыг анхааруулж байна.

ОХУ-ын Якутын бүс нутгийн дунд Сибирт гарсан түймэр унтраагүй бөгөөд орон нутгийн иргэд болоод гал унтраах ангийнхан түймрийг унтраахаар ажиллаж байна.

Наймдугаар сарын 7-ны байдлаар нийт 300 удаагийн давтан түймэр гарч, 12140 км талбайг хамарсан. Түймрийг унтраахаар 5302 хүн 873 техник, тоног төхөөрөмж, 34 онгоцтой ажиллаж байгаагаас гал унтраах 11 онгоц байгаа мэдээлэлтэй байна.

Мэргэжлийн байгууллагуудын зөвлөж буйгаар түймрийн утаа тархсан үед агаарын давхаргын доогуур тоосжилт их үүсдэг бөгөөд энэ тоосжилтод хүүхдүүд хамгийн их өртдөг аж. Энэ нь нүдэнд харагдахгүй тул иргэдийг бага насны хүүхдийг гадуур дагуулж явахгүй байхыг зөвлөж байна.

Мөн хоолойгоо давс, соданы уусмалаар зайлах шаардлагатай. Зайлшгүй тохиолдолд хүүхдээ дагуулж яваа бол амны хаалтыг тогтмол зүүлгэх хэрэгтэй. Иргэд аль болох гэрээсээ гарахгүй байж, гэртээ чийгтэй цэвэрлэгээ хийж, утааны саармагжилт арилтал цонхоо онгойлгохгүй, бүр шаардлагатай бол утаа багассан үед агаар сэлгэлтийг богино хугацаанд хийх хэрэгтэйг анхааруулж байна.