Засгийн газрын ээлжит хуралдаан өнөөдөр болж байна.
Боловсрол, шинжлэх ухааны сайд Л.Энх-Амгалан Есдүгээр сарын 1-нээс сургууль, цэцэрлэгийг цахим болон танхимын хэлбэрээр эхлүүлэх шийдвэр гаргасан талаар мэдээллээ.
Тэрээр "Засгийн газрын өнөөдрийн хуралдаанд 2021-2022 оны хичээлийн шинэ жилийг эхлүүлэх мэдээлэл хийж, үүрэг даалгавар авлаа. Өнгөрсөн хоёр жилийн хугацаанд манай улс бусад орны адил сургуулиа хаасан. 2019-2020 оны хичээлийн жилд нийт хичээлийнхээ 47 хувьд хаалттай байсан. 2020-2021 оны хичээлийн жилд танхимаар хичээллэх 62-68 хувийн боломжоо бид алдсан байна. Мөн өнгөрсөн хоёр жилийн хугацаанд танхимаар хичээллэх боломжийнхоо 60 хувийг алдсан байна.
НҮБ-ын Юнескогоос гаргасан зөвлөмжөөр цар тахлын үед сургууль цэцэрлэг хаасан нь ганцхан сурлагын хоцрогдолд оруулах биш давхар сэтгэл санааны хямрал нүүрэлсэн он жилүүд болсон гэсэн дүгнэлтийг хийсэн.
Өнгөрсөн хоёр хичээлийн хугацаанд зурагт, интернэтгүй 185 мянган хүүхэд хичээлийн хоцрогдолд орсон. Үүнээс гадна 470-500 мянга орчим хүүхэд хичээлийн бодитой хохиролд орсон гэсэн судалгаа байна. Иймээс бид энэ хичээлийн шинэ жилийг Есдүгээр сарын нэгнээс эхэлж тодорхой үе шаттайгаар танхимын болон танхимын бус хослуулсан хэлбэрээр нээх шийдвэрийг Засгийн газраас гаргаж байна.
Цэцэрлэгийн 4, 5 настай хүүхдүүд Есдүгээр сарын 1-нээс эхлээд танхимын болон танхимын бусаар ЕБС-тай адил эхлүүлнэ. Тав хоног танхимаар хичээлдээ ирнэ. Тав хоног гэртээ байж цахимаар хичээлээ хийгээд явна" гэлээ.
Мөн тэрээр "Цар тахлын хууль хэдийгээр үйлчилж байгаа ч Үдийн цай хөтөлбөрийг үргэлжлүүлэн хэрэгжүүлнэ" гэлээ.
