Английн төрийн зүтгэлтэн тансаглалаас холдож чадаагүй нэгэн байв.

Түүхчид XVI зууны тюдорын үеийн VIII Генрих хааны гол сайд Томас Кромвель гэх хүчирхэг бөгөөд азгүй зүтгэлтний амьдарч байсан  харшын зураг төрхийг гаргаж чаджээ.

Лондон хотын Austin Friars гэх түүхэн байранд байрлаж байсан тансаг байрны зургийг шинэ судалгааны үндсэн дээр маш нарийн детальтайгаар бүтээн үзүүлжээ.

Эксетерийн их сургуулийн доктор Ник Холдер захидал баримтууд, түрээсийн гэрээ, асуулга ба тооллогын жагсаалтыг судлан 1530-аад оны Лондоны “хамгийн их сэтгэгдэл төрүүлэх хувийн байрны” бүрэн төрхийг гаргаж чаджээ.

Түүний олдвор нь зураач Питер Урмстонд хүчтэй сэтгэгдэл төрүүлэн тэр баримтын дагуу  уг ордны давхрууд, 58 өрөө тасалгаа, теннисийн корт, боулингтай том цэцэрлэг, үйлчлэгч нарын амьдардаг чердакийн хамт зургийг нь гаргасан байна. Шилтгээнд хэд хэдэн гал тогоо, зочны өрөө, оффис, дарсны зоорь, том мөргөлийн сүм зэрэг бүгд байв.

Зоогийн газрын эзэн ба шар айраг нэрэгчийн хүү Томас Кромвель 1533 оноос засагт сан хөмрөгийн канцлер болон гарч ирээд 1534 оноос хааны гол зөвлөх болжээ. Тэрээр английн өөрчлөлт шинэчлэлийн гол үзэл сурталч бөгөөд англикан үзэл баримтлалыг үндэслэгч нарын нэг байжээ.

Нууц зөвлөлийн 1540 оны хуралдаан дээр улсаас урвасан ба тэрслүү үзэлтэн гэж буруутган Кромвелийг баривчилжээ. Кромвелийг найдваргүй нөхөр гэж түүний өрсөлдөгчид герцог Норфолк Томас Говард епископ Стивен Гардинер хоёр VIII Генрих хаандаа итгүүлж чадсан ба Кромвелийг 1540 оны Долдугаар сарын 28-нд цаазалжээ.

Кромвелийн үхлийн дараа 1543 онд уг байшинг худалдан авсан худалдааны бүлгийн Drapers 'Company компанийн архивт хадгалагдан үлдсэн “үнэ цэнэтэй” баримтуудын буянаар уг шилтгээний сэргээн зургийг нь бүрэн гаргах боломжтой болсон байна.

Шилтгээн 1666 оны Лондоны их түймэрт нэрвэгдэн сүйрсэн ба одоо түүнээс юу ч үлдсэнгүй. Ийм шилгээн нь Тюдорын үеийн ердийн католик жентельмены байшин байсан гэж мэргэжилтнүүд тэмдэглэжээ.

М.ЦОГТ