Хүнс тэжээлийн дэмжлэг олгох журамд оруулсан нэмэлт, өөрчлөлтийг захиргааны хэм хэмжээний актад бүртгэн авчээ.
Энэхүү журамд нэлээд олон өөрчлөлт оруулсныг "Хугацаатай болсон, нөхцөлтэй болсон, хяналттай болсон, хариуцлагатай болсон" хэмээн ХНХ-ын сайд А.Ариунзаяа онцолжээ.
Тухайлбал, хаустай, хоёроос дээш тээврийн хэрэгсэлтэй, 200-с дээш малтай, хоёроос дээш орон сууцтай иргэд хүнс тэжээлийн дэмжлэгээс хасагдана.
Мөн уг дэмжлэгийн хүрээнд өрхүүдэд хүнс олгох дэлгүүрийг сонгон шалгаруулахаа больж, НӨАТ-ийн баримт олгодог, кассын системтэй ямар ч дэлгүүрээр дэмжлэгт хамрагдаж буй иргэд хүнсээ сонгон авах боломжтой болж байна.
Тодруулбал, "10 нэр төрлийн бүтээгдэхүүнийг нэгдсэн бар кодлох, улс даяар нэгдсэн тоо баримттай болох зорилтыг дэвшүүлсэн" хэмээн ХНХ-ын сайд А.Ариунзаяа өөрийн албан ёсны хуудсаар мэдээлжээ.
