Засгийн газрын өнөөдрийн хуралдаанаар коронавирусийн эсрэг вакцины гурав дахь тунтай холбоотой асуудлыг хэлэлцсэн бөгөөд Эрүүл мэндийн яамнаас тодорхой зорилтот бүлэгт хандсан гурав дахь тунгийн вакцинжуулалтыг эхлүүлэх тухай төлөвлөгөөгөө танилцуулжээ.
Энэ талаар Ерөнхий сайдын Хэвлэлийн төлөөлөгч Ч.Болортуяа дэлгэрэнгүй мэдээлэл өглөө.
Тэрээр "Засгийн газар болон Улсын Онцгой комиссын хуралдаанаар вакцины гурав дахь тунгийн асуудлыг хэлэлцэж байгаа. Дэлхийн эрүүл мэндийн байгууллагаас гурав дахь тунг хийхийг хараахан зөвлөөгүй байна. Гэхдээ зарим улс орон гурав дахь тунг хийж эхэлсэн, зарим нь судалж байна.
Манай улс ч мөн судалж байна. Эрүүл мэндийн яам наймдугаар сард багтаж тодорхой зорилтот бүлэгт хандсан гурав дахь тунгийн вакцинжуулалтыг эхлүүлэх тухай төлөвлөгөөгөө өнөөдөр танилцуулсан.
Одоогоор Засгийн газар, Улсын Онцгой комиссоос албан ёсны шийдвэр гаргаагүй бөгөөд судалгаа, төлөвлөлтөө хийж байх үүрэг өгсөн. Энэ хүрээнд ГХЯ, ЭМЯ вакцины татан авалтууд дээр ажиллаж байгаа" гэлээ.
