Өчигдрийн УИХ-ын чуулганы хуралдаанаар Боловсролын тухай хуульд өөрчлөлт оруулах тухай хуулийн төслийг хэлэлцжээ. Энэхүү хуульд өөрчлөлт орсноор төрийн өмчит боловсролын байгууллагын удирдлагыг томилгоог цэгцлэх юм.

Энэ талаар Боловсролын сайд А.Энх-Амгалан:
Цэцэрлэг сургуулийг улс төрчид удирдана гэдэг байж болохгүй зүйл. Үүний хор хохирлыг бид олон жил амсаж ирсэн. Удирдлага нь зөвхөн мэргэжлийн хүн байх ёстой. 2012-2019 онд 789 сургууль, цэцэрлэгийг захирал, эрхлэгчид солигдсон байна. Их дээд сургууль төгсөөд л сумандаа очоод шууд цэцэрлэг, сургуулийн удирдлага болох үзэгдэл ч байна. Худалдан авалт, томилгоог зөвхөн цэцэрлэг, сургуулийн захирал өөрийн үзэмжээр хийдэг. Тиймээс улс төрчдийн савраас боловсролын байгууллагын удирдлагын тогтолцоог аврах цаг ирсэн. Орон нутгийн сонгуулийн дараа цэцэрлэг, сургуулийн удирдлага солигддог байдлыг хална. Олон жил ажилласан удирдлага тэтгэвэртээ гарахгүй хүлээж байгаад хүүхдүүдээ өөрийнхөө албан тушаалд тавьдаг үзэгдэл ч байна. Тиймээс УИХ-ын Боловсрол, соёл, шинжлэх ухаан, спортын байнгын хорооны өнөөдрийн хуралдаанаар УИХ-ын гишүүн Г.Тэмүүлэн, Ж.Бат-Эрдэнэ нарын өргөн мэдүүлсэн Боловсролын тухай хуульд өөрчлөлт оруулах тухай хуулийн төслийг дэмжиж байна.

УИХ-ын гишүүн Г.Тэмүүлэн:
Өнгөрсөн Баасан гарагт Архангай аймгийн нэг суманд Засаг дарга нь хоёр сургуулийн захирал, нэг цэцэрлэгийн эрхлэгчийг үүрэгт ажлаас нь чөлөөлж оронд нь өөр хүн томилсон гэх мэдээлэл ирсэн. Тэгэхээр нэг сумаар хязгаарлагдахгүй Монгол Улсын 21 аймаг 330 суманд ийм нийтлэг дүр төрх бий. Бид үүнийг таслан зогсоох ёстой. Хэрэв чанартай боловсролыг хүсэж л байгаа бол тэдгээр албан хаагчид, төрийн албыг тогтвортой, улс төрөөс ангид байлгах шаардлагатай юм.