“Зуун жилийн яруу алдар, зузаан найрамдлын гэрч” Хятад, Монголын сэтгүүлчдийн хамтарсан цахим сурвалжилгын баг Ниншя нутагтаар өнөөдөр зочиллоо. 

ӨМӨЗО-ны Яргай хотын Минь Нин суурин нь Яргай хотын өмнөд хэсэгт, Хулан уулын зүүн талд оршдог ажээ.

Хятадын коммунист намын төв хороо, төрийн зөвлөлийн зүгээс 1996 онд тус нутагт стратегийн үзэл баримтлалын дагуу ядуурлыг бууруулах урт хугацааны ажлыг эхлүүлсэн байна.

20 гаруй жилийн хугацаанд Хатан голын сав газрыг ухан суваг татаж, үржил шимгүй газрыг засан сайжруулжээ. Мөн орон сууц, зам барих, цөлжилтөөс сэргийлэх, үйлдвэрийг хөгжүүлэх, ядуурлыг бууруулах зорилгоор иргэдийг уриалан ажиллаж, хамтдаа шинэ сайхан орчин байгуулж чаджээ.

1997 онд Минь Нин суурингийн нэг хүнд ногдох орлого нь 500 юань байсан бол 2018 он гэхэд 12988 юаньд хүрч, 26 дахин өссөн байна. Мөн 8000 гаруй хүн амтай байсан муж өдгөө 66 мянга гаруй хүн амтай болжээ.

Бид үргэлжлүүлэн Цагаан мөөгний аж ахуйтай танилцлаа. 

Ядуурлыг бууруулсан үлгэр жишээ нутаг болох Минь Нин сууринд цагаан мөөг тариалах “Хэ Фа” эко тариалангийн шинжлэх ухаан, технологийн хөгжлийн төв байдаг. Анх 2018 онд байгуулагдсан “Хэ Фа” компани нь 14 үйлдвэрийн цехтэй, Өвөр Монголын Үхай хот, Хөххот, Ганьсү муж, Ниншягийн Хотон үндэстний өөртөө засах орны нутгуудаар бүтээгдэхүүнээ борлуулдаг аж.

Цагаан мөөгний тариалалтаар дагнан үйл ажиллагаа явуулдаг “Хэ Фа” компани Минь Нин суурингийн Фү Нин тосгон, Юань И тосгон, Мүлань тосгон, Ү Хэ тосгонтой ашиг орлого, үйл ажиллагаагаар холболдох тогтолцоог байгуулж, ядуурлыг бууруулах чиглэлийг баримталж жил бүр тосгоны иргэдийн зөвлөлд тодорхой хэмжээний ашиг хувааж, улмаар тосгоны иргэдийн эдийн засгийн орлогыг нэмэгдүүлж байна.

Иргэдийг дэмжин ядуурлыг бууруулах талд тус компани гурван арга барилыг ашиглан иргэдийн орлогыг нэмэгдүүлж байна.

Тодруулбал, тариаланчид ба хоршоонуудын буудай, эрдэнэ шишийн иш сүрэл, гэрийн тэжээврийн ялгадас зэргийг худалдан авч тэжээл бордоогоор ашиглаж байна. Энэ нь хог хаягдлыг дахин ашиглах хэмжээг нэмэгдүүлсэн төдийгүй хүрээлэн буй орчны ариун цэврийг сайжруулан, тосгоны иргэдийн орлогыг нэмэгдүүлжээ. Мөн тосгоны иргэдийг ажлын байраар хангаж байна. Түүнчлэн, тосгоны иргэд компанид хувьцаа эзэмших хэлбэрээр жилийн эцсийн ашиг орлогоос хувь хүртэж  байна. 

Цагаан мөөг нь 45 хоногт ургаж боловсордог бөгөөд тус компани жилд 6 удаа тариалалт явуулдаг байна.