Үндэсний Их баяр наадмыг зохион байгуулахтай холбогдуулан наадмын комиссоос мэдээлэл хийлээ. 

Наадмыг зохион байгуулах хорооны дарга Н.Баатархүү "Үндэсний их баяр наадам нь тогтмол хугацаанд зохион байгуулдаг хуульчлагдсан баяр. Энэ жил наадмыг Хүй долоон худагт цахим байдлаар зохион байгуулахад бэлтгэл ажил эхэлсэн. Энэ жил наадмыг 2.8-3 тэрбум төгрөгийн хооронд хийнэ. Ардын хувьсгалын 100 жилийн ойн тэмдэглэлт нь үүнээс тусдаа бүтэн жил үргэлжлэх зүйл юм. 10 тэрбум төгрөг нь Ардын хувьсгалын 100 жилийн ойн бүтэн жилийн үйл ажиллагааны санхүүжилт юм. Наадамд оролцогсод Хүй долоон худагтаа гурав хоног байрлаж, тэндээ шинжилгээ өгнө. Хүй долоон худагт худалдаа үйлчилгээ явахгүй. Гэрээгээр оролцогсдын хоол хүнсийг хангаж ажиллана" гэлээ. 

Харин Соёлын дэд сайд М.Батбаяр "Наадмыг цахим хэлбэрээр шууд дамжуулна. Наадмаа цахимаар үзэж гэртээ байна гэж ойлгож болно. Орон нутгийн наадмыг Долдугаар сарын 20-ноос хойш тэмдэглэх талаар ярилцаж байна. 2021 оны Зургаадугаар сарын 14-нд наадмыг зохион байгуулах хорооны шийдвэрээр Ерөнхий найруулагчаар СГЗ Н.Наранбаатар, Ерөнхий продюсераар Г.Цоггэрэл, зөвлөх найруулагчаар Б.Баатар нар ажиллаж байна" гэв. 

Үүний даараа Үндэсний их театрын дарга Г.Цоггэрэл "Цахим наадамд цөөхөн хүн оролцуулахыг бодож 350 хүнээр төлөвлөсөн. 100 цэрэг, 250 урлагийн хүн байна. Коронавируст халдварын үед сэтгэл санаагаа өндөр байлгаж байж давж гарна. Иймээс наадмаа тэмдэглэх хэрэгтэй. Энэ жилийн наадам өмнөхөөс өөр болно. Б.Баатар хувийн юм хийх гэж байгаа зүйл огт биш.

Наадмын нээлт 2016, 2017, 2018, 2019, 2020 онд 600 сая төгрөг байсан. Энэ жилийн хувьд 850 сая байна. Уран бүтээлчдийн дархлааг унагахгүйн тулд эрүүл ахуйн асар их бэлтгэлтэй байх болно" гэсэн юм. 

Мөн энэ жилийн баяр наадамд хүчит бөхийн барилдаанд 1024 бөх зодоглох бөгөөд “Хүй долоон худаг”-т Долдугаар сарын 10-12-ны хооронд 3 өдөр үргэлжлэх юм байна.