"Зуун жилийн яруу алдар, зузаан найрамдлын гэрч” Хятад, Монголын хэвлэл мэдээллийн хамтарсан цахим сурвалжлагын арга хэмжээ үргэлжилж байна. Өнөөдөр ӨМӨЗО-ны Баяннуур хотын “Тэнгэрийн Хишигт Бортохой” компанитай сурвалжлагын багийнхан танилцлаа.
Тус компаниийг Баяннуур аймгийн засаг захиргаа болон “Мэн Цао” групп хамтран өөр бусад долоон аж ахуйн нэгжийн хөрөнгө оруулалттайгаар байгуулсан, үр тарианы техникийн хөгжлийн чиглэлээр үйл ажиллагаа явуулдаг. Энгийнээр хэлбэл ургамлын үрийг тухайн тариалах газрын хөрсөнд тохируулан судалж, ямар хөрсөнд ямар ургамал илүү сайн ургахыг тооцоолон гаргадаг. Үр тарианы ургацыг нэмэгдүүлэхэд тухайн газрын хөрсний бүтэц чухал үүрэг гүйцэтгэдэг юм байна. Мөн энэ судалгаа, тооцоолол нь байгаль орчныг нөхөн сэргээхэд өмнө туршигдаж байсан аргуудаас илүү үр дүнтэй болох нь батлагджээ.
“Тэнгэрийн Хишигт Бортохой” компани Баяннуур хотын Хөдөө аж ахуйн өндөр технологийн аж үйлдвэрийн үлгэр жишээ бүсэд байрладаг, төслийн нийт хөрөнгө оруулалт 450 сая юань буюу 198 тэрбум төгрөг...
Үрийн аж үйлдвэрийн шинжлэх ухаан, технологийн парк нь үрийн аж үйлдвэрийн дата өгөгдлийн гол цөм болж, Хатан голын сав газрын баруун хойд бүс нутгийн байгалийн нөөцийг тодруулж, хийсвэр ба бодит байдлыг хослуулах аргаар үрийн хөгжлийн үйл явцыг харуулдаг байна. Энд Гермплазмын буюу генийн нөөцийн музейтэй. Үрийн өнгөрсөн, өнөө, ирээдүйг харуулсан сонирхолтой орон зайг бий болгожээ.
Герплазмын нөөц хадгалах сан нь ургамлын үрийг 30-50 жил амьдаар нь хадгалах боломжтой. Харин генийн сан, хөрс хадгалах санд цэцэрлэгт хүрээлэн, олон төрлийн суурин газраас цуглуулсан хөрсний дээжийг хадгалдаг байна. Харин Үрийн шижилгээний төвд үрийг хураах, үрийг түр хадгалах, үрийг цэвэрлэж сонгох, хатаах, савлах, үрийн соёололт, идэвхжил, чийгийн агууламж зэргийг тодорхойлох зэрэг нарийн ажлуудыг хийдэг. Мөн шинжлэх ухааны судалгаа, сургалт, дадлага хийхэд зориулагддаг байна.
40 мянган метр квадрат талбай бүхий Гермплазмын нөөцийн хүрээлэн гермплазмыг хадгалах, шинэчлэх, үнэлэх, тодорхойлох ажлыг зохион байгуулж, амьд бодисын олон янз байдлыг хамгаалах, гермплазмын нөөцийг хөгжүүлэх, ашиглах үндэс суурийг хангах зорилготой юм. Мэргэжлийн шинжээчдийн багт ургамлын үр боловсруулах, ургамлыг өвчин, хортон шавьжаас хамгаалах, хөрсийг сайжруулах, ургамлын ангилал, молекул биологи, микро биологи зэрэг салбарын мэргэжилтнүүд ажилладаг.
Аж үйлдвэрийн паркын платформд түшиглэн үр тариа, жимс, хүнсний ногоо, зэрлэг ургамал ба цөлийн ургамлын генийн нөөцийг цуглуулах, хадгалах, хөгжүүлэх, ашиглах ажлыг хийж, ургамлын шинэ төрлийн үрийг сонгох, үржүүлэх үндэс суурийг бүрдүүлснээр Хатан голын сав газрын баруун хойд бүс нутгийн аж үйлдвэрлэл, хөдөө аж ахуйн тогтвортой хөгжлийг дэмжих, эх орны умард хязгаарын экологийн аюулгүй байдал, хүнсний аюулгүй байдлыг баталгаажуулах, биологийн олон янз байдлыг хамгаалахад чухал ач холбогдолтой хэмээн тус улсад үнэлэгдэж байна.
