Цар тахлын нөхцөл байдалтай холбоотойгоор хүүхдийн мөнгөн тэтгэмжийг 100 мянган төгрөг болгон нэмэгдүүлсэн шийдвэр 2021 оны Долдугаар сарын 1-ний өдрөөр дуусгавар болно.

Энэ шийдвэрийг үргэлжлүүлэх эсэхийг Сангийн сайд Б.Жавхлан Засгийн газрын хуралдааны дараа мэдээлэл өгөхдөө тайлбар хийв. 

Тэрээр "Хүүхдийн мөнгийг 100 мянган төгрөгөөр олгох нь төсөвт хэдий хэмжээний ачаалал өгөх эсэх талаар судалгааг хийж байгаа. Тун удахгүй шийдвэр гарна. Асуудлыг судалж, УИХ-д танилцуулах бөгөөд шийдвэрийг УИХ-аас гаргана" гэлээ. 

Мөн тэрээр бараа бүтээгдхүүний үнийн өсөлтийн талаар "Засгийн газраас аливаа нэг бараа үйлчилгээний үнэ савлах бүрд үнийг нь хүчээр хямдруулаад, зөрүүг нь төсвөөр төлж татвар төлөгчдийн нуруун дээр авчраад байж болохгүй. Үүнийг зах зээлийн горимоор нь явуулах хэрэгтэй. Гагцхүү судалж үзээд зах зээлийн бус нөлөө байгаа эсэхийг харах хэрэгтэй. Дамлан зарж байгаа, монополь болж байгаа дээр л зохицуулалт хийнэ. Харин суурь үнэ зах зээлийнхээ жамаар явна. Монголд төдийгүй дэлхийн зах зээлд төмрийн хүдрийн үнэ өсөж байгаатай холбоотой металл хийцийн үнэ өсөж байна. Бид үүнд нөлөөлж чадахгүй. Шингээхээс өөр аргагүй. Харин тээвэрлэлтийг хэрхэн дэмжих талаар бодлого барьж болно.

Тухайлбал цементийн дотоодын үйлдвэрийг дэмжсэнээр дотоодын зах зээлээ 100 хувь хангадаг болсон. Үүний үр дүнд арматурын үнэ нэмэгдэхэд цементийн үнэ нэмэгдээгүй.

Төсвийн шинэчлэлийн хүрээнд 2021 онд тавигдсан тендер нь зарлагдаагүй, газар нь шийдэгдээгүй 61 төсөл бий. Эдгээрийг зогсоох талаар Засгийн газар дээр ярилцаж байна. 2022 оны төсвийг батлахдаа шинэлэг байдлаар хандана. Энэ жил 42 сая тонн нүүрс гаргахаар төлөвлөсөн. Тавдугаар сарын 31-нй байдлаар 8.7 сая буюу өмнөх жилээс хоёр дахин бага гараад байна. Машины тооны хувьд өдөрт 200-300 орчим гарч байна" гэв.