Засгийн газрын ээлжит хуралдаан болж, хуралдаанаас гаргасан шийдвэрийг Ерөнхий сайдын хэвлэлийн төлөөлөгч Ч.Болортуяа болон Сангийн сайд Б.Жавхлан нар мэдээллээ.  

Ерөнхий сайдын хэвлэлийн төлөөлөгч Ч.Болортуяа "Засгийн газрын өнөөдрийн хуралдаанаар цар тахлын нөхцөл байдлыг авч хэлэлцсэн. Үйлчилгээний салбарын зарим аж ахуйн нэгжийн үйл ажиллагаанд долоо хоногийн хугацаанд хязгаарлалт хийх шийдвэр гаргалаа. 

Тодруулбал, хоол үйлдвэрлэлийн заалны үйлчилгээг долоо хоногийн хугацаанд хязгаарлах, хориглох шийдвэр гарсан. Түүнчлэн, коронавирусийн халдварын эсрэг эмчилгээний тактикийг өөрчлөх шийдвэр гаргалаа.

Эрчимт эмчилгээний үйлчилгээг сайжруулах, нас баралтыг бууруулах чиглэлд онцгой анхаарал хандуулж эмчилгээний тактикийг өөрчлөхөөр боллоо. 

Мөн Ерөнхий сайд болон Улсын онцгой комиссоос аль болохоор хатуу хөл хорио тогтоохгүй байх чиглэл баримталж ажиллаж байгаа.

Өнөөдрийн хуралдаанаар нэгэн чухал шийдвэр гаргасан нь Ерөнхий сайд Үндэсний их баяр наадмыг цахимаар үзэгчгүй зохион байгуулах чиглэл өгсөн. Наадмыг цахимаар зохион байгуулахтай холбоотойгоор наадмын төсвөөс хэмнэгдсэн мөнгийг эрүүл мэндийн салбарт буюу цар тахалтай тэмцэхэд зориулна. Түүнчлэн бүх аймаг, сумдын баяр наадмыг зогсоох, хориглох шийдвэр гаргалаа" гэлээ. 

Харин Сангийн сайд Б.Жавхлан "Цар тахалтай холбоотойгоор олгож буй хөнгөлөлт чөлөөлөлтийн үйлчлэлийн хугацаа 2021 оны Долдугаар сарын 1-нээр дуусгавар болно. Хүүхдийн мөнгийг 100 мянган төгрөг болгож нэмэгдүүлсэн, цахилгаан дулааны мөнгийг хөнгөлсөн зэрэг шийдвэрүүдээс алийг нь цаашид үргэлжлүүлэх эсэхээс хамаарч төсөвт тодотгол хийх эсэхийг шийднэ" гэлээ.