Өнөөдөр Засгийн газрын ээлжит хураладаан болж байна. Хуралдаанаар коронавируст халдварын нөхцөл байдал болон Үндэсний их баяр наадмыг цахимаар зохион байгуулах талаар хэлэлцэж байна. 

Үүний хажуугаар Засгийн газрын зарим сайдыг солих асуудал хөндөгдөж эхэлжээ.

Тодруулбал, Эрүүл мэндийн сайд С.Энхболд хамгийн эхэнд огцрох сайд нарын дунд нэр нь яригдаж байгаа аж. Коронавирусийн халдвартай тэмцэж байгаа энэ үед Эрүүл мэндийн сайдын чандасыг хамгийн их сорьж, шалгаж байгаа гэхэд болно. Өмнөх сайд нь ч гэсэн салбартаа хариуцлага алдсан шалтгаанаар танхимаараа огцорч байсан. 

Энэ удаад Эрүүл мэндийн сайд С.Энхболдыг хариуцлагагүй, уялдаа холбоогүй ажиллаж байгаа учраас огцруулна гэсэн мэдээлэл байна. 

Тодруулбал, хамгийн сүүлийн жишээ, өчигдөр үдээс хойш Эх, хүүхдийн 300 ортой эмнэлэгт коронавирусийн халдвартай жирэмсэн эх амь насаа алджээ. Тухайн эх ЭХЭМҮТ болон ХӨСҮТ-д хандсан боловч хүлээж аваагүйгээс халдвар хүндэрч нас барахад хүрсэн гэж үзэж байгаа юм. Уг асуудлыг салбарын түвшинд хөндөж сайдыг нь огцруулах асуудал яригдаж эхэлжээ.