Эдгээр уран зөгнөлийн барилгуудыг харахад аргагүйн эрхэнд өөрийгөө үлэмж биетийн оронд очсон Гулливер эсвэл эзнийхээ гал тогоонд төөрсөн муурын зулзага гэх сэтгэгдэл төрнө дөө. Гайхмаар...

Данхан байшин

Цайны музей, Мейтан, Хятад

Хятадын Гуйчжоу мужийн Мейтан тойрог хятад навчин цайны эх орон гэгдэх ба хөдөө аж ахуйн гол ургамлын бүс нутаг хэвээр байгаа. Данханд зориулсан томоохон хөшөө гэж Гиннессийн дээд амжилтын номонд бүртгэгдсэн. Цайны музейн байшинг 2010 онд барьжээ. Байшингийн өндөр нь 73,8 метр, бүсэлхийн хамгийн их диаметр нь 24 метр, дотор орон зайн талбай нь 5000 м² гаруй. Данхны суурь нь дөрвөн одтой зочид буудал болдог.

Левиафаны хэвлийд

Загас агнуурын хөгжлийн үндэсний зөвлөлийн байр, Хайдарабад, Энэтхэг

Салбарын захиргааны асар том загас хэлбэртэй байшинг 2020 онд босгож дуусчээ. Эхнээсээ л Барселон дахь Франк Герийн бүтээлийн "Алтан загас" (El Peix d'Or) баримал уран барилгачдад онгодыг дуудаж өгчээ. Зураг төсөл нь илүү цогц, футурист байсан юм. Харин барилгын ажлын явцад загас дэгжин төрхөө гээн "таргалж бүдүүрчээ". Загасны зүүн сэлүүр нь гол орох хаалганы саравч болдог ба шөнө байрыг үзмийн ягаан өнгөөр гэрэлтүүлдэг.

Шургуулган дах шопинг

Худалдааны төв, Жеймстаун, АНУ

Хойд Каролина мужийн Furnitureland South гэдэг худалдааны төв нь 120000 м² талбай эзэлсэн тавилгын томоохон дэлгүүр юм. Талбайгаас гадна түүний дэлхийн хамгийн том шургуулга хэлбэрээр хийгдсэн нүүрэн тал хүчтэй сэтгэгдэл төрүүлдэг. Шургуулгын өндөр нь 25,9 метр. Энэ дөрвөн давхар дэлгүүрийг тавилгын Диснейленд гэж зүй ёсоор нэрлэжээ.

Номын байшин

Нийтийн номын сан, Канзас-Сити, АНУ

Номын сан 1999 онд эхлээд Анхны Үндэсний банк байсан шинэ байрыг Канзас-Ситийн төвд авчээ. Түүний шинэчлэл нь 2004 онд  дуусч байрны нүүрэн тал нь хорин номыг босгон байрлуулсан асар том “номын тавиур” болон хувирав. Номын тэр цуглуулга нь Шекспирийн “Ромео ба Жульетта”,  Толкиены “Бөгж эзэгнэгч”, Хеллерын “Заль 22” зэргийн дэлхийн сонгодог уран зохиолын хөшөө дурсгал болж байна. “Ном” тус бүрийн өндөр нь 7м, өргөн нь 2м орчим.

Голын эрэг дэх “зугаалга”

Longaberger Basket байшин, Нью Йорк, АНУ

Longaberger Basket Company-ийн төв байрыг 1997 онд босгожээ. Асар том “сагс” 1997онд баригдсан байна. Компанийн эзэн Дейв Лонгабергерт компанийнхаа бүх үйлдвэрүүдийг гол бүтээгдэхүүн сагсны хэлбэрээр бариулах санаа төржээ. Тэр санаа нь хэтэрсэн их санаа болж таарав. Дейвын залгамжлагч нар 2008 онд энэ сонин байрыг худалдсан ба шинэ эзэн нь түүнийг таван одтой зочид буудал болгохоор шийдсэн байна. Тэр төлөвлөгөөнд нь коронавирус саад болоод өнгөрсөн онд түүнийг худалдахаар зарлажээ.

"Ганьбэй!"

Wuliangye Yibin компанийн төв байр, Ибинь, Хятад

Wuliangye Yibin компани нь Хятадын алкоголын томоохон үйлдвэрлэгч бөгөөд Сычуань мужийн Ибинь хотноо байрладаг. Түүний хамгийн алдартай бүтээгдэхүүн нь байцю (白酒 - "цагаан архи") гэх улаан буудайн архины улянъэ сортын алкогол бөгөөд 40-60 градусын чанга согтууруулах ундаа юм. Энэ тухай бүү мартаасай гээд тус компани 2010 архиныхаа лонхны хэлбэртэй оффисийн байраа босгожээ. Уг байрыг  арай бага хэмжээний лонхнууд тойрч байгаа. Эдгээр лонхонд компанийн контор, үйлдвэр, музей зэрэг байрладаг.

Бульдозерын үзэсгэлэн

United Equipment Company, Тарлок, АНУ

Компанийн эзэд сайн бульдозер алсаас харагдаж байх ёстой гэж үзэв. Компани нь барилгын техникийн худалдаа түрээс эрхэлдэг ба рекламын самбрын оронд төв байраа Caterpillar гэдэг шар бульдозер болгон хувиргажээ.

Хивс

Хивсний үндэсний музей, Баку, Азербайджан

Музей 1967 онд байгуулагдсанаас хойш цөөнгүй удаа байраа сольсоор 2014 онд Михаил Усейновын өргөн чөлөөний  Үндэсний цэцэрлэгийн нутаг дэвсгэрт шинэ байр босгосон нь хотын дурсгалт газар болон хувирч жуулчдыг татах болов. Хуйлсан хивсний хэлбэртэй байрны зураг төслийг Австрийн уран барилгач Франц Янс бүтээсэн ба музейд хивсний нэхмэл ба чимэглэх урлагийн 14 мянган үзмэр байрладаг.

Гурван хөгжөөнтэй мэргэд

Tianzi Hotel, Ланфан, Хятад

Tianzi гэх зочид буудлын нэрийг “Тэнгэрийн хөвгүүн” гэж буулгаж болох бөгөөд түүнийг 2000 онд Бээжингээс машинаар нэг цаг яваад хүрэх Хэбэй мужийн Ланфан хотод босгожээ. Гайхалтай гэмээргүй 41,6 метрийн өндөр 10 давхар байшингийн нүүрэн талыг гурван бурхадын дүрээр чимжээ. Зүүн талын цэнхэр хувцастай Шу урт насыг, төвийн улаан хувцастай Фу нь азыг, баруун талын ногоон хувцастай Лу нь цэцэглэлтийг бэлгэддэг. Байрны гол хаалга нь Шугийн баруун хөлөнд байрлажээ.

Робот техникийн хуулиар

United Overseas Bank, Бангкок, Тайланд

Robot Building нэрээр алдартай болсон банкны төв байрыг 1987 онд босгосон ба эхлээд энэ төслийг санаачлан уран барилгач Сумет Джумсаид захиалсан Bank of Asia тэнд байрлаж байлаа. Тэр нь компьютерын техник банкны ажил хэрэгт ямар нөлөөтэй гаргахаар шийдсэн байна. Хүүгийнхээ тоглоомын роботыг уран барилгач жишиг болгон аваад зургийг гаргажээ. Робот барилгын хоёр нүд нь хоёр том хэлэлцээрийн тасалгааны цонхнууд юм.

Хуримын шаахай

High-Heel Wedding Church, Будаи, Тайвань

Өндөр өсгийтэй болор шаахайг дүрсэлсэн сүмийн байшинг Тайванийн зүүн эргийн Будай  хотод 2016 онд босгожээ. Барилгын өндөр нь 17,76 метр, өргөн нь 11,9 метр ба урт нь 25,16 метр байрыг цэнхэр шилний 320 хэсгээр бүтээжээ. Тэр жилдээ уг байшин Гиннессийн дээд амжилтын номонд шаахайд зориулсан хамгийн том хөшөө гэж бичигдэн оржээ. Уг сүмд зөвхөн хуримыг л бүргэдэг үүнээс өөр шашины элдэв ажил явуулдаггүй байна.

Крейцерын магтуу хөгжим

Хэфэйн технологийн их сургууль, Хэфэй, Хятад

Хар төгөлдөр хуур түүнд түшүүлэн тавьсан шилэн хийлийн дүрстэй байшинг Аньхой мужийн Хэфэй хотын технологийн их сургуулийн уран барилгын факультетын оюутнуудын зураг төслөөр 2007 онд босгожээ. Барилга өөрөө гурван бетон хөл дээр боссон ба орох хаалга шат нь хийл  хөгжимд байрлажээ. Дээвэр  дээр нь зуны тагттай бөгөөд түүнийг бороо салхинаас төгөлдөр хуурын таг нь сөхөгдсөн байдлаар хамгаалдаг байна. 

М.Цогт