Улаанбаатар хотод энэ сарын 7-8-нд үргэлжлэн усархаг орсон борооны улмаас зарим авто зам, явган хүний зам, нүхэн гарц усанд автаж, иргэдийн хөдөлгөөнд саад учруулаад байна. Мөн зуслангын бүсүүдэд ч байдал хүндхэн байна. Түүнчлэн, цаг агаарын урьдчилсан мэдээллээр Улаанбаатар хотод тав хоног дуу цахилгаантай аадар бороо орох төлөвтэй байна.
Хотын дарга Д.Сумъяабазар болон холбогдох албаны хүмүүс үер усны гамшгаас сэргийлэх чиглэлээр газар дээр нь ажиллаж байна.
Тэрээр энэ үеэр "Нийслэлд хийсэн замууд борооны ус зайлуулах хоолойгүй байгаа. Энэ нь иргэдийн амь нас, аюулгүй байдалд нөлөөлж, цаашлаад гамшгийн нөхцөл байдлыг бий болгож байна. Тиймээс шилдэг инженерүүдийг ажиллуулах ёстой юм. Үерийн усны ам болон эрсдэлтэй байршил дээр гэр хороолол барьсан байдаг. 2-3 хоног бороо ороход ийм нөхцөл үүсэж байгаа юм чинь 1966 оных шиг 14 хоног бороо орвол хот тэр чигээрээ урсах эрсдэлтэй байна. Шийдэл, гарцыг дандаа инженерийн тооцоо, судалгаатай гаргаж байх хэрэгтэй. Ажлыг хямд аргаар шийдсэний эцсийн үр дүн муу гарч байна" гэсэн юм.
Үерийн хамгаалалтын бүсэд одоогоор 1098, Сэлбэ голын сав газарт Сүхбаатар, Чингэлтэй дүүргээс газар олгосон 13081 айл, өрх суурьшсан байна.
Хотын дарга Сэлбэ гол орчимд Байгаль орчны үнэлгээ хийлгэж, голын хамгаалалтын бүсэд олгосон газрын захирамжийг цуцлах, үер усны гамшгаас хамгаалах ажлыг эрчимжүүлэхийг холбогдох албаныханд үүрэг болголоо.
Мөн Сэлбэ голын ай савд нэмж газар олгохгүй байхыг Нийслэлийн Газар зохион байгуулалтын албаныханд үүрэг болгов.