Монгол Улсын Ерөнхийлөгчийн 2021 оны ээлжит сонгуулийн ирц улсын хэмжээнд 11:00 цагийн байдлаар 13.34 хувьтай буюу 267,614 хүн саналаа өгөөд байна. 

Тодруулбал, Улаанбаатар хотод 14.75 хувь байгаа бол Говьсүмбэр аймагт ирц хамгийн их буюу 16.30 хувьтай байна. Харин хамгийн бага ирцтэй нь Баян-Өлгий аймаг бөгөөд 4.81 хувьтай байгаа юм. 

Дашрамд дурдахад, энэ жилийн Ерөнхийлөгчийн сонгуульд санал өгөх 2,040,784 иргэнийг нэрсийн жагсаалтад бүртгэжээ. Харин гадаадад сонгууль өгөх 7,394 хүн бүртгэснээс 5618 сонгогч саналаа өгсөн байна. Харин "түр хасав" тэмдэглэгээтэй 110,545 иргэн байна.

Өчигдөр 09:00-20:00 цагийн хооронд зөөврийн санал хураалтад оролцохоор бүртгүүлсэн иргэдийн 92.1 хувь нь саналаа өгчээ.

Тодруулбал, эмнэлэгт тусгаарлагдан эмчлүүлж буй 920 хүн санал өгсөн байна. Мөн гэрийн тусгаарлалтад байгаа 4,869 сонгогч саналаа өгчээ. Нийт коронавирусийн халдвар аваад тусгаарлалтад байгаа 5,789 сонгогч саналаа өгчээ.