Ерөнхий сайд Л.Оюун-Эрдэнэ “Токио-2020” зуны олимпын наадамд оролцох баг тамирчдын төлөөллийг хүлээн авч уулзлаа.
Уулзалтын эхэнд Засгийн газрын хуралдааны шийдвэрийг танилцуулжээ.
“Токио-2020” зуны олимп, паралимпийн эрх авсан тамирчин тус бүрт 10 сая төгрөгийн нэг удаагийн мөнгөн урамшуулал олгоно.
Үндэсний шигшээ багийн бүрэлдэхүүний цалинг ирэх Зургаадугаар сарын 1-нээс Есдүгээр сарын 30 хүртэл сард нэг сая таван зуун мянга, цаашид тамирчны цалинг сард нэг сая хоёр зуун мянга, дасгалжуулагчийн цалинг нэг сая таван зуун мянган төгрөг хүртэл нэмжээ.
Ерөнхий сайд Л.Оюун-Эрдэнэ “Засгийн газар баг, тамирчдаа бүхий л талаар анхаарч дэмжинэ. Өнөөдрийн шийдвэр бол сэтгэлийн дэм юм. Та бүхэн минь авъяас чадвар, хурд хүчээ дайчлан өндөр амжилт үзүүлж Монгол түмнээ баярлуулна гэдэгт итгэлтэй байна” гэлээ.
Мөн алтан соёмбот төрийн далбаагаа өндөрт өргөж, олимпын медальтан олноор төрүүлэхийн ерөөл дэвшүүлээд Үндэсний шигшээ багийн ерөнхий дасгалжуулагч, хөдөлмөрийн баатар, ардын багш Ч.Насантогтоход төрийн далбаа гардууллаа.
Тэрээр “Манай тамирчид Токиогийн олимпод амжилт гаргах бүрэн бололцоотой. 2008 оны олимпын амжилтаа бататгах бүрэн итгэлтэй байгаа” гэсэн юм.
